گرتے بالوں کی روک تھام کے لیے صحت مند طرز زندگی اپنائیں

دنیا بھر میں کروڑوں افراد کو عمر بڑھنے پر گنج پن کا سامنا ہوتا ہے۔ کنگھا کرنے پر معمول سے زیادہ بال نکلنا یقینا پریشانی میں مبتلا کر دیتا ہے۔ اس کی وجہ کچھ بھی ہوسکتی ہے جیسے وٹامن کی کمی، تناؤ، نیند کی کمی ، ذیابیطس یا دیگر امراض ۔ اگر آپ کو بھی اس مسئلے کا سامنا ہے تو درج ذیل عادتوں کو اپنالیں۔

لہسن آپ کے بالوں کے گرنے کے مسئلے کو ختم کرسکتا ہے جس کی وجہ اس میں شامل الیسین کی بھرپور مقدار ہے۔ یہ سلفر کمپاؤنڈ پیاز میں بھی پایا جاتا ہے اور ایک طبی تحقیق کے مطابق بالوں کے گرنے کی روک تھام کے لیے موثر ہے۔ لہسن کو کاٹ لیں اور اس کی پوتھیوں کو سر پر ملیں۔ آپ تیل میں بھی لہسن کو شامل کرکے مساج کے ذریعے یہ فائدہ حاصل کرسکتے ہیں۔

بال پروٹین سے بنتے ہیں اور اگر آپ کی غذا میں اس کی کمی ہو تو جسم کو سر کے بالوں کو برقرار رکھنے میں جدوجہد کا سامنا کرنا پڑتا ہے۔ ناشتے میں انڈے، دوپہر اور رات کو کھانے میں مچھلی اور سرخ گوشت کا استعمال اتنا مشکل بھی نہیں تاہم اگر گوشت پسند نہیں تو دالوں اور چنوں وغیرہ کا بھی استعمال کیا جاسکتا ہے، جو پروٹین سے بھرپور ہوتی ہیں۔

تناؤ گھنے اور صحت مند بالوں کا دشمن ہوتا ہے، جس سے بچنے کے لیے مراقبہ، یوگا، چہل قدمی، ہنسنا ہسانا اور دیگر ہلکے پھلکے مشغلوں کا سہارا لیا جاسکتا ہے، جس کے نتیجے میں گنج پن کا خطرہ بھی کم ہوجاتا ہے۔

کبھی بھی مناسب نیند کی اہمیت کو نظرانداز نہ کریں، ہمارا جسم اُس وقت درست طریقے سے کام کرتا ہے جب رات کو 7 سے 8 گھنٹے کی نیند لی جائے، اس سے تمام جسمانی نظام ری چارج ہوجاتے ہیں جن میں بال بھی شامل ہیں، جب کوئی شخص نیند کی کمی کا شکار ہوتا ہے تو اس کے بال تیزی سے گرنا شروع ہوسکتے ہیں۔

ہر ممکن حد تک صحت بخش غذا استعمال کریں اور جنک فوڈ کو کم از کم اپنی غذا کا حصہ بنائیں، پراسیس (ڈبہ بند) غذائیں درحقیقت چینی اور نقصان دہ فیٹس سے بھرپور ہوتی ہیں جو جسم کے ساتھ بالوں پر بھی منفی اثرات مرتب کرتی ہیں۔

ایک تحقیق کے مطابق 24 ہفتوں تک روزانہ 4 منٹ تک سر کی مالش بالوں کے گھنے پن میں اضافہ کرتی ہے، دراصل ایسا کرنے سے سر میں دوران خون بڑھ جاتا ہے جو بالوں کے لیے فائدہ مند ہوتا ہے۔

 ناریل کے تیل کا استعمال آپ کے بالوں کو ٹوٹنے سے بچاتا ہے اور انہیں لمبا اور گہنا رکھنے میں مدد دیتا ہے،  ناریل کا تیل اور لیموں کا جوس ملا کر لگانے سے آپ اپنے بالوں کو لمبے عرصے تک سفید ہونے سے بھی روک سکتے ہیں۔

گرم پانی سے سر دھونے سے گریز کریں، گرم ڈرائیر کو بھی بالوں سے دور رکھیں، ضرورت سے زیادہ کنگھا یا برش نہ کریں، معیاری شیمپو، کنڈیشنر اور دیگر مصنوعات کا استعمال کریں جبکہ جل وغیرہ لگانے کی صورت میں بالوں کو لازمی وقفہ دیں۔

ہر مہینے یا6 ہفتوں کے دوران بالوں کو تراشنا ایک اچھا خیال ہے جس سے بالوں کے 2 منہ ہونے کے مسئلے سے بچا جاسکتا ہے۔

ان باتوں کا خیال رکھ کر آپ بالوں کو صحت مند اور گھنا کرسکتے ہیں۔