پانی کے ستائے عوام نے بی جے پی رہنما کو جوتوں کا ہار پہنا دیا

       نئی دہلی- - - - -  ریاست مدھیہ پردیش میں پانی کے ستائے عوام نے ووٹ مانگنے کے لیے آنے والے بی جے پی رہنما کو جوتوں کا ہار پہنا دیا۔ میڈیا کے مطابق حکمران جماعت بی جے پی کے رہنما دنیش شرما آئندہ آنے والے بلدیاتی انتخابات کے لیے مدھیہ پردیش کے ضلع ڈہر کے علاقے دھموند میں گھر گھر جا کر اپنی جماعت کے لیے ووٹ مانگ رہے تھے۔دنیش شرما نے دیکھا کہ ایک شخص جوتوں کا  ہار لئے اس کی جانب بڑھ رہا ہے تو اس سے وہاںنہ جانے کی کوشش کی لیکن اس شخص نے جوتوں کا ہار بی جے پی رہنما کے گلے میں ڈال کر ہی دم لیا۔عوام کی بڑی تعداد نے اس منظر کو براہ راست بھی دیکھا اور اپنے موبائل فونز میں بھی محفوظ کیا، بعد ازاں کچھ افراد نے اس ویڈیو کو سوشل میڈیا پر شیئر بھی کیا۔بی جے پی رہنما کے گلے میں جوتوں کا ہار ڈالنے والے شخص کا کہنا تھا کہ وہ اس طرح سے اپنے علاقے میں پانی کی شدید قلت کے مسئلے کو اجاگر کرنا چاہتا تھا۔احتجاج کرنے والے شخص کا مزید کہنا تھا کہ ہم نے اس حوالے سے شکایت بھی کی لیکن کوئی شنوائی نہیں ہوئی، ہماری خواتین چیئرپرسن کے پاس گئیں لیکن ان کے خلاف ہی مقدمہ درج کر لیا گیا۔ پولیس کو بھی اس حوالے سے بتایا لیکن جب کوئی فائدہ نہیں ہوا تو ایسا کرنے پر مجبور ہوا۔دوسری جانب بی جے پی رہنما نے کھسیانی بلی کھمبانوچے کے مصداق بیان دیتے ہوئے کہا کہ یہ میرے اپنے لوگ ہیں، یقینایہ لوگ کسی بات پر خفا ہوں گے جس کے باعث انہوں نے ایسا کیا۔دنیش شرما نے کہا کہ میں ان کے بچوں کی طرح ہوں، ہم ان کے ساتھ مل کر بیٹھیں گے اور ان کے مسائل کو حل کرنے کی کوشش کریں گے۔