انگلش پریمیئر لیگ : بڑی ٹیموں کی ناکامیاں، مانچسٹر یونائیٹڈ اور چیلسی ہار گئیں

لندن:انگلینڈ میں بڑے فٹبال ٹورنامنٹ پریمیئر لیگ میں بڑی ٹیموں کی ناکامی کا سلسلہ جاری ہے اور آرسنل کی شکست کے بعد مانچسٹر یونائیٹڈ اور چیلسی کو بڑی ناکامیوں سے دوچار ہونا پڑا ۔مانچسٹر یونائیٹڈ کو ٹوٹنہم ہوٹسپرنے0-2جبکہ چیلسی کو بورنماﺅتھ نے0-3 شکست دے دی۔لیگ ٹیبل پر مانچسٹر سٹی نے68پوائنٹس کے ساتھ اپنی پوزیشن مستحکم کررکھی ہے تاہم بقیہ 4ٹیموں میں شامل مانچسٹر یونائیٹڈ، لیور پول، چیلسی اور ٹوٹنہم کے لئے اپنی جگہ برقرار رکھنا مشکل ہو رہا ہے اور ٹیمیں پوائنٹس کے معمولی فرق کے ساتھ آگے پیچھے ہیں۔مانچسٹر یونائیٹڈ کے خلاف میچ میں ٹوٹنہم کے کھلاڑی کرسٹیان ایرکسن نے میچ شروع ہو تے ہی گول کرکے اسٹار کھلاڑیوں سے سجی ٹیم کو پریشانی سے دوچار کردیا تھا جبکہ رہی سہی کسر فل جونز نے اس وقت پوری کردی جب انہوں نے خود اپنے خلاف گول کرکے ٹوٹنہم کی برتری 0-2کردی۔ویمبلے اسٹیڈیم میں کھیلے جانے والے میچ میں دونوں ٹیموں کے درمیان سخت مقابلے کی توقع تھی صورتحال بڑی حد تک یکطرفہ رہی۔کرسٹیان ایرکسن نے میچ کے ابتدائی 11 سیکنڈز میں گول کرکے مانچسٹر کے کوچ کو بھی دباو کا شکار کردیا جو کھلاڑیوں کو باربار تبدیل کرتے رہے لیکن اس کا کوئی فائدہ نہیں ہوا جب 28ویں منٹ میں یونائیٹڈ کے فل جونز نے خود ہی اپنے نیٹ میں گیند پھینکی تو ٹیم کی ناکامی پر بھی مہر لگ گئی اور اسی اسکور پر0-2سے یہ میچ ٹوٹنہم کے حق میں اختتام کو پہنچ گیا۔دوسری جانب چیلسی کو بھی اپنے ہوم گراونڈ پر غیر متوقع ناکامی سے دوچار ہونا پڑگیا اور پوائنٹس ٹیبل پر پوزیشن بہتر بنانے کے امکانات کو بھی زبر دست دھچکا لگا ۔ میچ کا پہلا بغیر کسی ہاف برابری پر ختم ہوا تھا تاہم دوسرے ہاف میں بورنماوتھ نے دباوبڑھایا جس کے نتیجے میں کولم ولسن نے گول کرکے مقابلہ ایک صفر کردیا۔صرف13منٹ کے بعد جونیئر سٹینیسلاس نے دوسرا گول کرتے ہوئے برتری دگنی کردی اور کچھ ہی دیر بعدناتھن ایکے نے تیسرا گول کرکے چیلسی کی شکست یقینی بنا دی۔یہ میچ دیکھنے کیلئے کلب کے نئے کھلاڑی اولیور گیروڈ اور ایمرسن پالمیری بھی اسٹینڈز میں موجود تھے جو حال ہی میں معاہدے کرکے چیلسی کلب کا حصہ بنے ہیں۔