غیر ملکی کھلاڑیوں کی عدم موجودگی سے نقصا ن ہوگا، سرفراز احمد

شارجہ:پاکستان کرکٹ ٹیم کے کپتان اور پی ایس ایل میں کوئٹہ گلیڈی ایٹرز کی قیادت کرنے والے سرفراز احمد کا کہنا ہے کہ گزشتہ سال بھی غیر ملکی کھلاڑیوں کے پاکستان نہ جانے سے ہمیں سب سے زیادہ نقصان ہوا تھا اس بار بھی یہی صورتحال ہے لیکن جو بھی کھلاڑی دستیاب ہوں گے ان کی مدد سے فائنل میں پہنچے تو اسے جیتنے کی پوری کوشش کریں گے۔ ایک سوال پر انہوں نے کہا کہ آسٹریلیا کے کرس گرین اور بین لافلین یقینی طور پر پاکستان جانے کو تیار ہیں،کیون پیٹرسن منع کر چکے ہیں جبکہ شین واٹسن نے ابھی حتمی فیصلہ نہیں کیا۔ میچ کے حوالے سے ان کا کہنا تھا کہ آخری گروپ میچ میں ہماری بیٹنگ نہیں چل سکی ۔سرفراز احمد نے کہا کہ انور علی اچھا کھلاڑی ہے اگر کارکردگی دکھاتا تو اس کا مستقبل اچھا تھا لیکن وہ ناکام رہا تو اسے اندازہ ہے کہ اب اسے پاکستانی ٹیم میں آنے کےلئے مزید سخت محنت کرنا ہوگی۔