وزن میں اضافے کے ساتھ بعض اوقات گردن کے گرد چربی جمع ہونا شروع ہو جاتی ہے ۔ جس کے باعث گردن موٹی اور لٹکی ہوئی محسوس ہوتی ہے ۔ گردن کے اطراف میں چربی کا جمنا بےخوابی کے امراض کے خطرے کو بڑھا دیتا ہے ۔ یہ صحت اور خوبصورتی دونوں کو متاثر کرنے کا سبب بنتا ہے ۔ طرز زندگی میں مثبت تبدیلی لا کر آہستہ آہستہ اس مسئلے سے نجات حاصل کی جاسکتی ہے ۔
موٹی گردن سے چھٹکارا پانے کے لئے سب سے اہم بات یہ ہے کہ اپنی غذا پر کنٹرول کریں ۔ ایسی غذاؤں سے پرہیز کریں جن میں میٹھے اور چکنائی کی زیادہ مقدار موجود ہو ۔ پراسیسڈ فوڈز سے بھی اجتناب کریں ۔ ایسی غذائیں لیں جو قدرتی ہوں ۔ پھلوں اور سبزیوں میں تمام ضروری غذائی اجزا بکثرت موجود ہوتے ہیں اور ان میں کیلوریز کی مقدار قدرے کم ہوتی ہے ۔ میٹھے کا استعمال کم سے کم کریں ۔ کولڈرنگ کو اپنے معمول کی غذا سے نکال باہر کریں ۔ ڈبہ بند غذائیں استعمال کرنے سے پہلے اس کے لیبل پر شکر کی مقدار ضرور پڑھ لیں ۔ میٹھے کا زیادہ استعمال دیگر کئی بیماریوں کا سبب بھی بنتا ہے ۔ ذیابیطس ، قبل از وقت چہرے پر جھریاں اور گردن پر چربی چڑھنے کی اہم وجہ میٹھے کا ضرورت سے زیادہ استعمال ہے ۔ اپنی خوراک میں میٹھے کی مقدار کنٹرول کریں اور پانی کے استعمال کو جس قدر ممکن ہو بڑھا دیں ۔ اس سے جسمانی زہریلی کثافتیں دور ہوجاتی ہیں اور جلد بارونق نظر آتی ہے ۔ زیادہ پانی پینا وزن کم کرنے اور گردن کے اطراف سے چربی کم کرنے میں انتہائی مددگار ہے ۔ اسکے علاوہ باقاعدہ ورزش اور ہوگا کے ذریعے بھی گردن کی چربی کم کی جا سکتی ہے ۔ کارڈیو ورزشیں مثلاً جاگنگ ، تیز قدموں کے ساتھ چہل قدمی اور سوئمنگ وغیرہ موٹی گردن سے نجات دلانے کے لئے بہترین ہیں ۔
