مکہ مکرمہ کی تمام مساجد میں نماز کا ثواب حرم شریف جیسا ہی ہے، شیخ العبدلی

مکہ مکرمہ..... مکہ مکرمہ کی تمام مساجد میں نماز کا اجر و ثواب حرم شریف جیسا ہی ہے۔ ان دنوں مسجد الحرام میں غیر معمولی اژدحام ہے لہذا معتمرین و زائرین اپنے اپنے محلوں کی مساجد ہی میں نماز کا اہتمام کریں۔ خشوع و خضوع کے ساتھ عبادت کریں۔ شدید اژدحام کے باعث حرم شریف میں خشوع و خضوع کی کیفیت حاصل ہونا مشکل ہے۔ یہ وضاحت مکہ مکرمہ ریجن میں وزارت اسلامی امو رو دعوت و رہنمائی کے ڈائریکٹر جنرل شیخ علی بن سالم العبدلی نے رمضان کے آخری عشرے میں دیکھے جانے والے اژدحام کے تناظر میں جاری کی ہے۔ انہوں نے مکہ مکرمہ کی مساجد کے ائمہ ، خطیبوں اور منتظمین سے کہا ہے کہ وہ اپنے اپنے یہاں معتمرین و زائرین میں اس شرعی مسئلے کو واضح شکل میں بیان کریں۔ معتمرین و زائرین کو سمجھائیں کہ وہ اپنے محلے کی مسجد میں نماز پڑھیں گے تب بھی انہیں حرم شریف میں نماز ادا کرنے جیسا اجر و ثواب حاصل ہوگا۔ العبدلی نے زائرین کو مخاطب کرتے ہوئے کہا کہ آپ حضرات از خود دیکھ رہے ہیں کہ رمضان کے آخری عشرے میں حرم شریف کے سارے صحن نمازیوں سے کھچا کھچ بھرے ہوئے ہیں۔ بعض لوگ صحنوں میں جگہ نہ ملنے پر اطراف کی سڑکوں ، راہداریوں، فٹ پاتھوں ، تجارتی مراکز کی گزر گاہوں تک میں صفیں بچھائے ہوئے ہیں۔ ایسے عالم میں خشوع و خضوع کی کیفیت حاصل نہیں ہوسکتی۔ سکون واطمینان کیساتھ نمازیں اپنے محلے کی مساجد میں ادا کریں۔ العبدلی نے مزید بتایا کہ اللہ تعالیٰ نے نماز کیلئے مساجد مختص کی ہیں ۔ جو لوگ سڑکوں اور فٹ پاتھوں پر نماز ادا کررہے ہیں وہ ایک طرح سے راہگیروں کی حق تلفی کررہے ہیں اور انہیں آنے جانے میں مشکلات دے رہے ہیں۔ اس سے گریز واجب ہے۔ بعض علماءنے سڑکوں اور فٹ پاتھوں پر نماز کو مکروہ قرار دیا ہے۔ واضح رہے کہ سیکیورٹی فورسز کے اداروں خصوصاً حرم سیکیورٹی فورس کے سربراہوں نے بھی ایس ایم ایس کے ذریعے تمام سعودی شہریوں، مقیم غیر ملکیوں اورعمرہ و زیارت کیلئے آنے والے پیارے مہمانوں سے یہی درخواست کی ہے کہ وہ عمرے اور طواف کیلئے حرم شریف جائیں البتہ نمازوں کیلئے اپنے محلوں ہی کی مساجد کو ترجیح دیں۔