خونی” بلو وہیل“ مملکت پہنچ گئی، 12 سالہ عبدالرحمان گیم کا شکار ہو گیا

ریاض .... بلو وہیل گیم کی ہلاکت مملکت تک پہنچ گئی ۔ خونی کھیل نے ایک 12 سالہ عبدالرحمان الاحمری کی جان لے لی ۔ عاجل ویب نیوز نے اپنے ذرائع کے حوالے سے لکھا ہے کہ دنیا بھر میں تہلکہ مچا نے والا خونی گیم ” بلو وہیل“ مملکت میں پہنچ گیا ۔ کھیل کا شکار قصیم ریجن میں 12سالہ عبدالرحمان نے خود کو پھانسی لگا کر خودکشی کر لی ۔ پولیس وقوعہ کی تحقیقات کر رہی ہے ۔ دریں اثناءالعربیہ نیٹ سے گفتگو کرتے ہوئے عبدالرحمان کے والد نے کہا کہ اس کا بیٹا سیکنڈری کلاس کا طالب علم تھا ۔ اس میں کبھی کوئی غیر معمولی تبدیلی محسوس نہیں کی ۔ بیٹے کے پاس اسکا اپنا موبائل فون بھی نہیں تھا البتہ وہ گھر کا کمپیوٹر استعمال کرتا تھا ۔ جس دن واقعہ ہوا اس نے روزہ رکھا ہوا تھا اور ہم سب کے ساتھ اس نے افطار بھی کیا جس کے بعد وہ اپنے کمرے میں چلا گیا ۔ والد نے مزید کہا کہ گھر والے تیار ہو کر جب باہر جانے لگے تو عبدالرحمان کو آواز دینے کے باوجود وہ نہیں آیا تو اس کی تلاش شروع ہوئی ۔ وہ اپنے کمرے میں بھی دکھائی نہیں دیا جبکہ سارے گھر میں بھی نہیں تھا ۔ پڑوس میں بھی اس کے بارے میں معلوم کروایا گیا مگر کوئی اطلاع نہیں ملی ۔ جس پر ہم سب پریشان ہو گئے اور عبدالرحمان کی تلاش شروع کی جب دوبارہ اس کے کمرے میں گئے تو وہ پردے کے پیچھے لٹکا ہوا دکھائی دیا ۔ عبدالرحمان نے پردے کی ڈوری گلے میں لٹکا کر خودکشی کرلی ۔