ریکارڈ سردی،نیا گرا آبشار بھی منجمد

  واشنگٹن...امریکہ اور کینیڈا میں ریکارڈ سردی پڑ رہی ہے۔ نیا گرا آبشار بھی جزوی طور پر منجمد ہوگئی ۔امریکہ میں تاریخ کا سرد ترین موسم ریکارڈ کیا گیا ۔ پارا منفی 30 تک گر گیا ۔ شدید سرد موسم کے باعث مختلف ریاستوں میں اموات کی تعداد 21 ہوگئی۔ شدید برفباری سے لوگ گھروں تک محدود ہوکر رہ گئے ۔ برفیلی ہواوں کے باعث صرف ایک دن کے دوران شکاگو میں مزید 9 اموات ہوئیں۔ الی نوائے میں برفیلی ہوا کا شکار معمر شخص گھر کے دروازے پر دم توڑ گیا ۔ ریاست انڈیانا میں گاڑی برف میں دھنسنے سے نوجوان جوڑا موسم کی شدت سے ہلاک ہوگیا۔ شکاگو میں برفیلے طوفان سے ایک شخص ہلاک ہوا ۔ملواکی میں ایک شخص گیراج میں منجمد ہوگیا۔ ڈیٹرائٹ میں 70 برس کا شخص پڑوسی کے دروازے پر دم توڑ گیا۔خون جماتی سرد ہوا کا شکار یونیورسٹی آف آئیوا کے طالبعلم کی لاش ہال سے برآمد ہوئی ۔ مشی گن میں بھی عمر رسیدہ شخص سرد ہواوں کا سامنا نہ کرسکا ۔ریاست آئیوا میں درجہ حرارت منفی 46 ڈگری سینٹی گریڈ تک گر گیا ۔ خراب موسم سے 2 ہزار 300 پروازیں منسوخ کی جا چکیں۔کئی ریاستوں میں آبی ذخائر جم گئے۔ مشی گن اور منی سوٹا میں گیس کی قلت پیدا ہوگئی ۔ آئیوا اور ونسکونسن میں بجلی کا بحران پیدا ہوگیا۔