اسلام آباد... وفاقی وزیر خارجہ شاہ محمود قریشی نے حالیہ پاک، ہند کشیدگی پر سارک اور دوست ممالک سے را بطے شروع کردئیے ۔ سری لنکن ہم منصب سے خطے کی صورتحال پر گفتگو کی گئی۔اس موقع پر وزیر خارجہ شاہ محمود قریشی نے کہاکہ سری لنکا پاکستان کا بہترین دوست ہے۔پاکستان خطے میں امن و امان کا خواہاں ہے۔وزیر خارجہ نے سری لنکن وزیر خارجہ کو سلامتی کونسل کے صدر کو لکھے گئے خط سے متعلق بھی آگاہ کیا۔ سری لنکن وزیر خارجہ تلکا مارا پانا نے کہا کہ سری لنکا خطے میں امن و امان کا خواہاں ہے۔محاذ آرائی کسی کے مفاد میں نہیں۔ تمام تنازعات کو پر امن طریقے اور بات چیت سے حل کرنے کی حمایت کرتے ہیں۔ دریں اثناء شاہ محمود قریشی نے نیپالی وزیر خارجہ پردیپ کمار گیاوالی سے بھی ٹیلیفونک رابطہ کیا ۔ خطے میں امن و امان کی صورتحال پر تبادلہ خیال کیا گیا ۔ وزیر خارجہ نے کہاکہ سارک فورم کا مقصد خطے کے ممالک کو قریب لانا ہے ۔سارک جنوبی ایشیا میں قیام امن کیلئے اپنا تعمیری کردار ادا کرے ۔ پاکستان امن و امان کے فروغ کے لئے جنوبی ایشیا اور اپنے ہمسایہ ممالک کو انتہائی اہمیت دیتا ہے ۔نیپالی وزیر خارجہ نے کہا کہ خطے میں امن و امان کا قیام سب کی بنیادی ذمہ داری ہے ۔ نیپال، سارک کا ممبر ہونے اور پاکستان کا دوست ہونے کے ناتے، پختہ یقین رکھتا ہے کہ امن کی پاسداری سب کے یکساں مفاد میں ہے ۔
