دبئی میں ’کچھ بھی ناممکن نہیں‘ وزارت کے قیام کا اعلان
متحدہ عرب امارات کے نائب صدر اور دبئی کے حکمران شیخ محمد بن راشد آل مکتوم نے دبئی میں ایک غیر روایتی وزارت تشکیل دینے کا اعلان کیا ہے۔ نئی وزارت کا نام ’وزارت اللامستحیل‘ ہے جس کا مطلب ’کچھ بھی ناممکن نہیں کی وزارت‘ ہے۔
الامارات الیوم کے مطابق نئی وزارت کا کوئی وزیر مقرر نہیں ہوگا تاہم کابینہ کے تمام ارکان اس کے رکن ہوں گے۔
کچھ بھی ناممکن نہیں وزارت مستقبل کے امکانات کا جائزہ لے گی، اسے امکانات کی وزارت کا بھی نام دیا جاسکتا ہے۔
شیخ محمد بن راشد آل مکتوم نے اپنے ٹوئٹر اکاؤنٹ پر اسں نئی وزارت کا اعلان کرنے کے بعد کہا ہے کہ امارات کی حکومت کے تحت ایک نئی اور غیر روایتی وزارت کے قیام کا فیصلہ کیا ہے۔ ہم نے اسکا نام ’’وزارت کچھ بھی ناممکن نہیں‘‘ رکھا ہے۔
اس وزارت کے دائرہ کار میں بنیادی قومی معاملات ہیں جنہیں مستقبل کے پیش نظر نمٹانا ہے۔
شیخ محمد بن راشد نے ایک اور ٹویٹ میں کہا کہ ہماری ڈکشنری میں ناممکن کا لفظ نہیں۔ ہم ناممکنات کو ممکن بنائیں گے۔ اسی لئے وزارت کا نام ہی کچھ بھی ناممکن نہیں رکھا ہے۔
قبل ازیں امارات نے اس طرح کی غیر روایتی وزارتوں کے قیام کا فیصلہ کیا تھا۔ ان میں سے ایک’’وزارت خوشی‘‘بھی ہے۔
اسی طرح ’’وزارت روا داری‘‘ اور’’وزارت نوجوانان‘‘کا بھی اعلان کیا گیا تھا۔
نئی وزارت کے اعلان پر ٹوئٹر صارفین نے خوشی کا اظہار کرتے ہوئے کہا ہے کہ امارات نے اپنے قیام سے لیکر اب تک ناممکنات کو ممکن بنا کر دکھایا ہے۔ اب اس حوالے سے باقاعدہ وزارت تشکیل دینے سے مستقبل کے امکانات کا جائزہ لے کر ہر ممکن کو ممکن بنایا جائے گا۔
