’تحریک آزادی زور پکڑے گی، پلوامہ جیسے واقعات ہوں گے‘

پاکستان کے وزیر اعظم عمران خان نے کہا ہے کہ انڈیا نے کشمیر کی آئینی حیثیت تبدیل کر کے قائداعظم کے دو قومی نظریے کو درست ثابت کر دیا ہے۔

انہوں نے کہا کہ اس کے اثرات دو ملکوں پر ہی نہیں پوری دنیا پر مرتب ہوں گے۔ ’ہم اس کے خلاف اقوام متحدہ دوسرے عالمی فورمز پر اس معاملے کو لے کر جائیں گے۔‘

منگل کو پارلیمنٹ کے مشترکہ اجلاس سے خطاب کرتے ہوئے پاکستانی وزیراعظم کا کہنا تھا کہ کہ پہلے بھی انڈیا نے حملے کی کوشش کی تھی جس کا ہم نے بھرپور جواب دیا۔

’اگر آگے بھی کبھی ایسا ہوا تو پھر یہی کچھ ہو گا اور اگر بات روایتی جنگ کی طرف گئی تو ہمارے سامنے دو راستے ہوں ایک بہادر شاہ ظفر والا اور دوسرا ٹیپو سلطان والا، اور ہم دوسرے راستے کا چنائو کریں گے اور خون کے آخری قطرے تک لڑیں گے۔‘

۔ قبل ازیں جب عمران خان تقریر کے لیے کھڑے ہوئے تو اپوزیشن بنچوں کی طرف احتجاج ہوا اور شور شرابہ شروع ہو گیا جس پر عمران خان نے کہا ’اگر اسی طرح شور رہا تو پھر میں بیٹھ جاتا ہوں‘ جس پر اپوزیشن بنچوں کی جانب سے یہ آواز بھی لگائی کہ ’بیٹھ جائیں‘

شور شرابہ بند نہ ہونے پر اپوزیشن لیڈر شہباز شریف کھڑئے اور اراکین کو خاموش ہونے کی تلقین کرتے ہوئے کہا کہ ’ان کو تقریر کرنے دیں، اسے سننے کے بعد ہم جواب دیں گے‘

اس کے بعد عمران خان نے پھر سے تقریر شروع کی۔

انہوں نے مزید کہا کہ اول دن سے ہی غربت کا خاتمہ اولین ترجیح تھی اس لیے تمام پڑوسیوں سے تعلقات اچھے کرنے کی کوشش کی اور تمام ہمسایہ ممالک کے دورے کیے لیکن بشکیک میں احساس ہوا کہ انڈیا اس کو ہماری کمزوری سمجھ رہا ہے۔

’انڈیا میں انتخابات کے پیش نظر پاکستان مخالف کارڈ استعمال کیا گیا اور جنگی صورت حال پیدا کی گئی جس کا بھرپور جواب دیا گیا اور اس کے باوجود ہم نے خیرسگالی کے جذبہ کے تحت انڈین پائلٹ کو رہا کیا۔‘

 عمران خان نے کہا کہ انڈیا جس قدر کشمیریوں کو دبائے گا اسی قدر مزاحمت بڑھے گی۔ ’کشمیر کی آئینی حیثیت تبدیل کیے جانے سے آزادی کی تحریک مزید زور پکڑے گی اور پلوامہ جیسے واقعات ہوں گے جس کے بارے میں میں ابھی سے پیشن گوئی کر دیتا ہوں کہ انڈیا اس کا الزام پھر سے ہم پر لگائے گا۔‘

ادھر پاکستان کی فوج کے سربراہ جنرل قمر جاوید باجوہ نے کہا ہے کہ پاکستان کشمیریوں کی حمایت میں ہر حد تک جانے کو تیار ہے۔

راولپنڈی کے فوج کے ہیڈ کوارٹر میں کشمیر کی صورتحال پر بلائے گئے کور کمانڈرز کے خصوصی اجلاس کے بعد پاک فوج کے شعبہ تعلقات عامہ کی جانب سے جاری بیان میں کہا گیا ہے کہ اجلاس نے حکومت کی طرف سے انڈین اقدام کو مسترد کیے جانے کی مکمل حمایت کی ہے۔

بیان میں کہا گیا ہے کہ ’پاکستان نے کبھی بھی انڈیا کی طرف آرٹیکل 370 اور 35 اے کے ذریعے جموں و کشمیر پر اپنے قبضے کو قانونی حثیت دینے کی بھونڈی کوشش کو تسلیم نہیں کیا۔ اب انڈیا نے خود ہی اپنی کوششوں کو ختم کر دیا ہے۔‘

بیان کے مطابق آرمی چیف نے کہا کہ پاکستانی فوج کشمیریوں کی جائز جدوجہد میں آخری تک ان کا ساتھ دے گی۔ ’ہم اس سلسلے میں اپنی ذمہ داریاں پوری کرنے کے لیے ہر حد تک جانے کے لیے تیار ہیں۔‘