حرمین شریفین سمیت تمام شہروں میں بارش کے لیے خصوصی نماز

حرمین شریفین سمیت سعودی عرب کے مختلف شہروں میں آج جمعرات کو بارش کے لیے نمازِ استسقاء پڑھی گئی۔ 

سعودی پریس ایجنسی کے مطابق بارش کے لیے ادا کی جانے والی نماز کا سب سے بڑا اجتماع مسجد الحرام میں ہوا جہاں کعبۃ اللہ کے پہلو میں امام وخطیب شیخ ڈاکٹر بندر بلیلہ نے امامت کراوئی اور بعد ازاں خطبہ دیا۔ 

• تازہ ترین خبروں کے لیے دیکھیے: اردو نیوز بلیٹن

گورنر مکہ مکرمہ شہزادہ خالد الفیصل اور گورنریٹ کے اعلی عہدیدار نمازیوں میں پیش پیش رہے۔ 

یاد رہے کہ خادم حرمین شریفین شاہ سلمان بن عبدالعزیز نے سعودی عرب میں آباد تمام لوگوں سے اپیل کی تھی کہ وہ جمعرات کو بارش کے لیے خصوصی نماز ادا کریں۔

بارش کے لیے خصوصی نماز کا دوسرا بڑا اجتماع مسجد نبوی شریف میں ہوا جہاں شیخ احمد بن طالب بن حمید نے امامت کروائی اور خطبہ دیا۔ 

نائب گورنر مدینہ منورہ شہزادہ سعود بن خالد الفیصل سمیت گورنریٹ کے عہدیدار موجود تھے۔ 

شاہ سلمان کی ہدایت پر نمازِ استسقاء ریاض، جازان، عرعر، جدہ، دمام اور الخبر کے علاوہ تمام شہروں میں بھی ادا کی گئی۔ 

واضح رہے کہ اسلام نے اپنے پیرو کاروں کو ہدایت کی ہے کہ جب وہ خشک سالی میں مبتلا ہوں تو نمازِ استسقاء یعنی بارش کے لیے خصوصی نماز ادا کریں۔ 

• سعودی عرب کی خبروں کے لیے واٹس ایپ گروپ جوائن کریں