طلباء کے لیے جدید ٹرانسپورٹ سروس 

سعودی عرب کی وزارت تعلیم کو سکول ٹرانسپورٹ فراہم کرنے والی تطویر ایجوکیشن ہولڈنگ کمپنی نے پہلے تعلیمی سمسٹر کے امتحانات کے دوران سکولوں کو جدید ٹرانسپورٹ خدمات فراہم کرنے کی تیاری مکمل کر لی ہے۔

عرب نیوز میں شائع ہونے والی رپورٹ کے مطابق ان سفری سہولیات سے وزارت کے زیر اہتمام اٹھارہ ہزار سکولوں کے بارہ لاکھ طلباء و طالبات مستفید ہو سکیں گے۔

سکول ٹرانسپورٹ سروس فراہم کرنے والی ایجوکیشن ہولڈنگ کمپنی کی جانب سے 25ہزار گاڑیاں مہیا کی جائیں گی جس کے لیے 28 ہزار ڈرائیور، تکنیکی ماہرین، سپروائزر اور انتظامیہ کے کارکنوں کی خدمات حاصل کی گئی ہیں جو بسوں کی دیکھ بھال ، موبائل ورکشاپ اور ایمرجنسی کی صورت میں متبادل بسوں کی فراہمی قابل یقین بنائیں گے۔

 گذشتہ ایک ہفتہ کے دوران کمپنی نے طلباءکو محفوظ اور آرام دہ سفری سہولیات کو یقینی بنانے کے لئے سعودی عرب میں اپنے زیر انتظام چلنے والی 6 ہزار 651 بسوں کی ضروری دیکھ بھال اور مرمت کے علاوہ حفاظتی جانچ پڑتال کی ہے۔ کمپنی کے فیلڈ مانیٹرسٹاف نے بسوں کے گیراج کا بھی معائنہ کیا ہے۔

سعودی عرب میں سکولوں کو سفری خدمات مہیا کرنے والی کمپنی نے سکول ٹرانسپورٹ کے لیے فراہم کردہ سروس کو اپ گریڈ کرتے ہوئے تین ہزار نئی بسوں کا اضافہ کیا ہے۔نئی بسوں کی شمولیت سے ٹرانسپورٹ خدمات میں مزید بہتری لائی جائے گی ۔

کمپنی نے طلباء، والدین اور ڈرائیوروں کو حفاظتی انتظامات متعارف کروانے کی آگہی مہم کے لیے کے تربیتی نشست کا اہتمام کیا ہے جس میں سیکیورٹی اقدامات میں اضافے کے بارے میں بتایا جائے گا ۔ بسوں کو جدید طریقے سے مانیٹر کیا جا سکے گا۔

اس وقت سعودی عرب میں 15 ہزار سکولوں کے 10 لاکھ سے زیادہ طلباء کوسفری سہولتیں فراہم کرنے کے لیے پچاس ہزار مختلف گاڑیاں موجود ہیں۔

 سکول بسوں کے لئے نئی ٹیکنالوجی تیار کرنے کے متعدد پائلٹ منصوبوں پر بھی کام کیا جا رہا ہے۔ڈرائیوروں کے ذمہ دارانہ طرز عمل کو یقینی بنایا جائے گا۔ طلباءکے لیے مخصوص بسوں کو براہ راست ٹریک کرنے کے لئے سیٹلائٹ سسٹم کے استعمال سے متعلق ایک منصوبہ بھی زیر غور ہے۔