ڈرائیوروں کے لیے نقد انعامات اور گاڑیاں کیوں؟

 سعودی عرب میں ٹریفک قوانین کے پابند ڈرائیوروں کے لیے 10 گاڑیاں اور تعریفی سرٹیفکیٹ انعام کے طور پر دینے کا فیصلہ کیا گیا ہے۔
محکمہ ٹریفک نے قوانین کی پابندی کو یقینی بنانے کے لیے اپنی نوعیت کی نئی مہم شروع کی ہے۔ 

ٹریفک ضوابط کی پابندی کرنے والوں کو تعریفی اسناد کے ساتھ دس گاڑیاں بھی انعام میں پیش کی جائیں گی۔

اخبار 24کے مطابق محکمہ ٹریفک نے نئی مہم روڈ سیکیورٹی نیشنل سینٹر کے تعاون سے شروع کی ہے۔تعریفی اسناد اور گاڑیاں شاہراہوں پر ڈرائیونگ کے دوران ٹریفک ضوابط کی پابندی کرنے والے ڈرائیوروں کو دی جائیں گی۔
محکمہ ٹریفک نے ایک وڈیو کلپ سوشل میڈیا پر شیئر کیا ہے جس میں دیکھا جاسکتا ہے کہ آگہی مہم چلانے والی ٹیم نے ٹریفک ضوابط کی پابندی کرنے والے دو ڈرائیوروں کا شکریہ ادا کیا ۔

 انہیں انعام کے طور پر ایک، ایک ہزار ریال نقد پیش کیے۔ محکمہ ٹریفک کے ڈائریکٹر جنرل کی جانب سے تعریفی سند بھی دی گئی۔
محکمہ ٹریفک کے مطابق انعامات کی تقسیم کا آغاز ریاض شہر سے کیا گیا ہے ۔مہم کے دوران یہ دیکھا جارہا ہے کہ ڈرائیور ٹریفک ضوابط کی کس حد تک پابندی کررہا ہے۔

 اس سلسلے میں رفتار اور لین کی پابندی نیز حفاظتی بیلٹ باندھنے ، موبائل استعمال نہ کرنے اور دائیں بائیں مڑتے وقت اشارہ دینے والے قوانین شامل ہیں۔
 واضح رہے کہ ٹریفک قوانین کی پابندی کرنے والے ڈرائیوں کو الجبر کمپنی ’کیا‘ کی گاڑیاں انعام کے طور پر پیش کی جائیں گی۔

خود کو اپ ڈیٹ رکھیں، واٹس ایپ گروپ جوائن کریں