پہلے میچ میں کوئٹہ گلیڈی ایٹرز فاتح

پاکستان سپر لیگ (پی ایس ایل) کے پانچویں ایڈیشن کے افتتاحی میچ میں دفاعی چیمپئن کوئٹہ گلیڈی ایٹرز نے شاندار کھیل پیش کرتے ہوئے اسلام آباد یونائیٹڈ کو تین وکٹوں سے شکست دے دی ہے۔

خیال رہے کہ اس سے قبل پی ایس ایل کے 2016 میں منعقد ہونے والے پہلے ایڈیشن کے افتتاحی میچ میں بھی یہی دونوں ٹیمیں مدمقابل تھیں۔

کوئٹہ گلیڈی ایٹرز کے اعظم خان نے بہترین بیٹنگ کا مظاہرہ کرتے ہوئے 59 رنز سکور کیے، جبکہ محمد موسی نے شاندار بولنگ کر کے تین وکٹیں حاصل کیں۔

اسی طرح اسلام آباد یونائیٹڈ کے ملان نے 64 رنز بنائے اور محمد حسنین نے چار وکٹیں لیں اور پلیئر آف دی میچ قرار پائے۔

اسلام آباد یونائیٹڈ کی طرف سے شاداب خان کپتانی کے فرائض انجام دے رہے تھے، جبکہ کوئٹہ گیڈی ایٹرز کے کپتان سرفراز احمد تھے۔

یہ پہلی مرتبہ ہے کہ پی ایس ایل کے تمام میچز پاکستان میں کھیلے جا رہے ہیں۔

پاکستان سپر لیگ کے پانچوں سیزن کی چھ ٹیموں میں 30 سے زائد غیر ملکی کھلاڑی بھی حصہ لے رہے ہیں۔

پاکستان سپر لیگ کے پانچویں ایڈیشن میں کراچی کنگز کی قیادت عماد وسیم کر رہے ہیں جبکہ لاہور قلندرز کے کپتان سہیل اختر ہیں۔ شان مسعود ملتان سلطانز اور سرفراز احمد کوئٹہ گلیڈی ایٹرز کے کپتان ہیں۔ اسلام آباد یونائیٹڈ کی کپتانی نوجوان کرکٹر شاداب خان کو سپرد کی گئی ہے جبکہ پشاور زلمی واحد فرنچائز ہے جس کی قیادت ایک غیر ملکی کھلاڑی کے ہاتھ میں ہے۔ ویسٹ انڈیز کے سابق کپتان ڈیرن سیمی پشاور زلمی کی قیادت کر رہے ہیں۔

پاکستان سپر لیگ کا آغاز 2016 میں ایک ایسے وقت میں ہوا تھا جب غیر ملکی ٹیمیں اور کھلاڑی امن و امان کی صورت حال کی وجہ سے پاکستان آنے سے انکاری تھے۔ اس لیے ٹورنامنٹ کا افتتاحی ایڈیشن مکمل طور پر متحدہ عرب امارت کے شہروں شارجہ اور دبئی میں کھیلا گیا تھا۔

تاہم دوسرے ایڈیشن سے ٹورنامنٹ کی بتدریج پاکستان منتقلی کا آغاز ہوا۔

پاکستان کے وزیراعظم عمران خان نے پی ایس ایل کے چوتھے ایڈیشن کے بعد اعلان کیا تھا کہ پانچویں ایڈیشن کے تمام میچز پاکستان میں کھیلے جائیں گے۔

پاکستان کرکٹ بورڈ کے مطابق پی ایس ایل 2020 میں کُل 10 لاکھ ڈالر کی انعامی رقم تقسیم کی جائے گی۔

پی ایس ایل فائیو کی فاتح ٹیم کو ایونٹ کی ٹرافی کے ہمراہ پانچ لاکھ ڈالر کی انعامی رقم بھی ملے گی، جب کہ پی ایس ایل فائیو کی رنراپ ٹیم دو لاکھ ڈالر وصول کرے گی۔