سلطانز نے کنگز کو 52 رنز سے ہرا دیا

پاکستان سپر لیگ کے دسویں میچ میں ملطان سلطانز نے کراچی کنگز کو 52 رنز سے ہرا دیا ہے۔

187 رنز کے ہدف کے تعاقب میں کراچی کنگز کی پوری ٹیم 17 اوورز میں 134 رنز پر ڈھیر ہوگئی۔  شاندار آل راؤنڈ کارکردگی پر معین علی کو پلیئر آف دے میچ قرار دیا گیا۔

کراچی کنگز نے جب اننگنز کی شروعات کی تو اوپنر شرجیل خان روایتی جارحانہ موڈ میں نظر آئے۔ لیکن معین علی کی ایک گیند کو پُل کرنے کی کوشش میں وہ ایل بی ڈبلیو آؤٹ ہوئے۔

بابر اعظم اور ایلکس ہیلز نے اسکور 45 تک پہنچایا لیکن محمد عرفان کی گیند پر محمد الیاس نے شاندار کیچ لے کر بابر کی اننگز کا خاتمہ کردیا۔

ایلکس ہیلز کا ایک کیچ ڈراپ ہوا لیکن وہ اس سے فائدہ اٹھانے میں ناکام رہے اور 29 رنز بنانے کے بعد شاہد آفریدی کو وکٹ دے بیٹھے۔

عمران طاہر نے کیمرون ڈیلپورٹ کا کام تمام کر کے اپنی ٹیم کو چوتھی کامیابی دلائی۔

کپتان عماد وسیم بھی زیادہ دیر وکٹ پر قیام نہ کر سکے۔ جب کہ چیڈول والٹن  15 رنز بنا کر آؤٹ ہوئے ۔کرس جورڈن اور افتخار احمد بالترتیب 13 اور 7 رنز بنا کر آؤٹ ہوئے۔ عمید آصف 20 رنز بنا کر سہیل تنویر کا شکار بنے۔

ملتان کی جانب کی عمران طاہر نے تین اور شاہد آفریدی اور سہیل تنویر نے دو دو وکٹیں حاصل کیں۔ معین علی، محمد عرفان اور محمد الیاس کے حصے میں ایک ایک وکٹ آئی۔

 اس سے قبل ملتان سلطانز نے چھ  وکٹوں کے نقصان پر مقررہ 20 اوورز میں 186 رنز بنائے.

BADLA!

Imran Tahir takes his revenge for a 94m six by getting rid off Chadwick Walton! #MSvKK #HBLPSLV pic.twitter.com/k8f2Wh6169

سلطانز کی جانب سے معین علی اور شان مسعود نے شاندار نصف سینچریاں سکور کیں۔

کراچی کنگز کی دعوت پر ملتان سلطانز نے بیٹنگ کا آغاز کیا تو ابتدا میں محمد عامر کے خلاف معین علی مشکلات سے دوچار نظر آئے لیکن دوسرے اینڈ سے ذیشان اشرف نے جارحانہ انداز اپنایا۔

ذیشان بہت اچھے ٹچ میں نظر آئے۔ وہ تیز کھیلنے کی کوشش میں افتخار احمد کی گیند پر بابر اعظم کے ہاتھوں کیچ آؤٹ ہوئے۔

نہوں نے تین چوکوں اور ایک چھکے کی مدد سے 23 رنز بنائے۔ اس کے بعد معین علی کا ساتھ دینے شان مسعود آئے اور دونوں کھلاڑی ذمے دارانہ بیٹنگ کا مظاہرہ کیا۔

معین علی نے ابتدا میں مدافعانہ بیٹنگ کے بعد جارحانہ انداز اپنایا۔

معین علی 42 گیندوں پر چار چھکوں اور اتنے ہی چوکوں کی مدد سے 65 رنز بنانے کے بعد پویلین لوٹ گئے۔

رلی روسو بھی وکٹ پر زیادہ دیر نہ ٹھر سکیں اور وہ صرف  آٹھ رنز بنا کر پویلین لوٹ گئے۔

شان مسعود نے جارحانہ بیٹنگ کرتے ہوئے 61 رنز بنائے۔

روی بوپارہ بھی ایک چھکا مارنے کے بعد محمد عامر کی دوسری وکٹ بن گئے جبکہ خوشدل شاہ بھی کوئی بڑا شاٹ کھیلنے میں ناکام رہے۔

اختتامی اوورز میں ملتان سلطانز کی ٹیم زیادہ تیزی سے رنز بنانے میں ناکام رہی اور مقررہ اوورز میں 6و کتوں کے نقصان پر 186رنز بنائے۔

کراچی کنگز کی طرف سے محمد عامر اور کرس جورڈن نے دو، دو وکٹیں حاصل کیں۔

خیال رہے جمعے کو دوسرا میچ پشاور زلمی اور لاہور قلندرز کے درمیان پنڈی کرکٹ سٹیڈیم میں طے ہے۔ شام میں ہونے والا یہ  میچ بارش سے متاثر ہونے کا خدشہ ظاہر کیا جا رہا ہے.

پوائنٹس ٹیبل پر کوئٹہ گلیڈی ایٹرز  اور ملتان سلطان کے چھ چھ پوائنٹس ہیں۔

اسلام آباد یونائیٹڈ چار میچ کھیلنے کے بعد چار پوائنٹس کے ساتھ تیسرے نمبر پر ہے۔

کراچی کنگز کے تین میچز میں دو پوائنٹس جب کہ پشاور زلمی کے تین میچوں کے بعد دو پوائنٹس ہیں۔

حسب معمول لاہور قلندرز دو میچوں میں شکست کے بعد پوائنٹس ٹیبل پر آخری نمبر پر ہے۔

خیال رہے جمعرات کو راولپنڈی میں ہونے والے میچ میں کوئٹہ گلیڈی ایٹرز نے اسلام آباد یونائیٹڈ کو دلچسپ مقابلے کے بعد پانچ وکٹوں سے شکست دی تھی۔

کوئٹہ کی جانب سے بین کٹنگ نے 17 گیندوں پر شاندار 42 رنز بنائے۔ انہوں نے آخری اوور میں دو چھکے لگا کر کوئٹہ کی فتح میں اہم کردار ادا کیا۔ اسلام آباد یونائیٹڈ نے پہلے کھیلتے ہوئے کوئٹہ کو جیت کے لیے 188 رنز کا ٹاگٹ دیا تھا۔ کوئٹہ نے مطلوبہ ہدف بیسویں اوور میں حاصل کی۔