چاند کعبہ کے عین اوپر کب ہوگا؟

جدہ کی فلکیاتی سوسائٹی کا کہنا ہے کہ 11 رجب بمطابق 6 مارچ کو چاند کعبہ کے عین اوپر ہوگا۔ یہ خوبصورت نظارہ آسانی سے دیکھا جاسکتا ہے۔

سوسائٹی کا کہنا ہے کہ رواں برس چاند کا کعبہ کے عین اوپر آنے کا یہ پہلا واقعہ ہوگا جسے عام آنکھ سے دیکھا جاسکے گا۔

مقامی ویب نیوز اخبار 24 نے جدہ کی فلکیاتی سوسائٹی کے حوالے سے بتایا ہے کہ کعبہ  کے عین اوپر  چاند 9 بج کر 55 منٹ پر آئے گا جسے دیکھ کر دور سے کعبہ کی سمت کا تعین بھی کرنا آسان ہو گا۔

واضح رہے چاند کے کعبہ کے عین اوپر دکھائی دینے کا منظر 2018 میں ہوا تھا جب کہ اسی برس 12 رمضان کو سورج عین کعبہ شریف کے اوپر دکھائی دیا تھا۔

ماہرین کا کہنا ہے کہ زمانہ قدیم میں اس فلکیاتی عمل سے لوگ کعبہ  کی سمت کا تعین کرتے ہوئے قبلہ درست کیا کرتے تھے۔