’کہیں بھی عورت کی تذلیل ناقابلِ قبول ہے‘

وزیراعظم عمران خان کی معاون خصوصی برائے اطلاعات ڈاکٹر فردوس عاشق اعوان نے نجی ٹی وی چینل پر معروف ڈرامہ نویس خلیل الرحمان قمر اور تجزیہ کار ماروی سرمد کے درمیان جھگڑے کو افسوس ناک واقعہ قرار دیا ہے۔

انہوں نے کہا ہے کہ ’میڈیا یا کسی بھی فورم پر عورت کی تضحیک و تذلیل ناقابلِ قبول رویہ ہے۔‘

جمعرات کو اپنے ٹوئٹر پیغام میں فردوس عاشق اعوان نے کہا کہ ’میڈیا کو ایسے حساس معاملات پر زیادہ ذمہ داری کا مظاہرہ کرنا چاہیے۔‘

انہوں نے کہا کہ ’ٹی وی چینل پر پیش آنے والا واقعہ قابل افسوس ہے، وجود کی نمائش خود عورت کی توہین ہے اور اس کی عزت و وقار اس کی حیا ہے۔‘

’عورتوں کے حقِ وراثت سے لے کر زینب الرٹ بل کی منظوری تک کے اقدامات عورتوں کے حقوق کے لیے حکومت کے پختہ عزم اور سوچ کا واضح اظہار ہے۔‘

انہوں نے کہا کہ ’وزیر اعظم عمران خان کی قیادت میں موجودہ حکومت خواتین کے ہر قسم کے استحصال کے خلاف ہے اور ان کے آئینی، قانونی، سیاسی ، سماجی اور معاشی حقوق کے تحفظ کے لیے پرعزم ہے۔‘
 معاون خصوصی برائے اطلاعات نے کہا کہ ’ہر مسلمان عورت کی رول ماڈل حضرت فاطمتہ الزہرا کی سیرت طیبہ اور امہات المومنین جیسی جلیل القدر ہستیاں ہیں۔‘

’پہلی مسلمان خاتون حضرت خدیجہ الکبریٰ تجارت پیشہ تھیں۔ اِسلامی تاریخ کے یہ روشن کردار ہمارے لیے مشعلِ راہ ہیں۔‘