کورونا عراقی نوجوان کی شادی نہ رکوا سکا

مہلک وائرس کورونا نے جہاں دنیا بھر میں موت اور لاک ڈاؤن سے لوگوں کو خوفزدہ کیا ہے وہیں دلچسپ واقعات بھی رونما ہو رہے ہیں-

عراق میں کورونا وائرس سے متاثرین کی تعداد بڑھ رہی ہے- اسی کے ساتھ حفاظتی اقدامات پر عمل درآمد کرانے والے ادارے انسانی بنیادوں پر شہریوں کے خواب بھی شرمندہ تعبیر کرا رہے ہیں-

الشرق الاوسط کے مطابق 23 سالہ عراقی نوجوان احمد خالد الکعبی کی شادی کی تاریخ مقررتھی ۔ کورونا وائرس کا پھیلاؤ بھی اس کے خواب کو شرمندہ تعبیر ہونے سے نہ روک سکا-

الکعبی نے النجف شہر کے سیکیورٹی اہلکاروں کے سامنے اپنا مسئلہ رکھا- جنہوں نے اس سے مدد کا وعدہ کر لیا-

النجف پولیس کے اہلکار باراتی بن گئے۔ دولہا کی گاڑی کو اپنے حصار میں لیا- دلہن کے گھر تک بارات پولیس بینڈ کے ساتھ پہنچی- تقریب میں صرف 6 افراد کو شریک کیا گیا-

الکعبی کا خواب تھا کہ اس کی شادی دھوم دھام سے ہو- تقریب میں تمام رشتہ دار اور دوست احباب شریک ہوں لیکن کورونا کے پھیلاؤ نے اس کے خواب کے دائرے کو محدود کر دیا-

شادی مقررہ وقت پر ہوئی لیکن اس میں رشتہ دار اور دوست احباب شریک نہ ہوسکے-

دلہن رقیہ رحیم کا کہنا ہے کہ اگر پولیس تعاون نہ کرتی تو مقررہ وقت پر ہماری شادی نہیں ہوسکتی تھی-

النجف عراقی شہر ہے جہاں کورونا وائرس کے متاثرین کی تعداد بہت زیادہ ہے- عراق میں جتنے مریض ریکارڈ پر آئے ہیں ان میں سے بیس فیصد کا تعلق النجف سے ہے-

عراق میں کورونا وائرس سے متاثرین کی تعداد 1352 سے تجاوز کرچکی ہے جبکہ 4 اموات بھی ہوچکی ہیں- صحت یاب افراد کی تعداد 640 ہے-

 خود کو اپ ڈیٹ رکھیں، واٹس ایپ گروپ جوائن کریں