امارات کا سلامتی کونسل کو خط، ترکی پر الزام

متحدہ عرب امارات نے اقوام متحدہ کی سلامتی کونسل کو خط لکھ کر ترک حکومت کی شکایت کی ہے۔ 

خط میں ترکی پر عرب دنیا میں انارکی پھیلانے کا الزام لگا یا گیا ہے۔

العربیہ نیٹ کے مطابق امارات نے عرب ممالک میں ترک حکومت کی سرگرمیوں کا تذکرہ کرتے ہوئے اپنے خط میں تحریر کیا ہے کہ ترکی اپنے مقاصد کی تکمیل کے لیے پناہ گزینوں کو آلہ کار کے طور پر استعمال کررہا ہے اور جارحانہ خارجہ پالیسی پر گامزن ہے۔ 

امارات نے اپنے خط میں کہا ہے کہ ترکی، افغانستان اور وسطی ایشیا کے لیے مبینہ طورپر داعش کے جنگجوؤں کا ٹھکانہ اور راہداری بن گیا ہے۔ 

امارات کا کہنا ہے کہ ترکی عرب دنیا میں انارکی پھیلانے کے لیے کوشاں ہے۔

امارات نے زور دے کر کہا ہے کہ ترکی ’کثیر فریقی‘ طریقہ کار کو نظر انداز کررہا ہے۔  سلامتی کونسل کی قراردادوں اور شام میں بین الاقوامی قانون کی خلاف ورزی کی جا رہی ہے۔ 

 خط میں توجہ دلائی گئی کہ اس کے برعکس امارات امن و سلامتی کے فروغ کے لیے کوشاں ہے۔