عراق:آئل ریفائنری پر میزائل حملہ ،جانی نقصان نہیں ہوا
اتوار 29 نومبر 2020 22:11
عراقی عہدیداروں نے بتایا ہے کہ ملک کے شمالی علاقے میں ’السینیہ‘ آئل ریفائنری پر میزائل حملے سے آگ بھڑک اٹھی ۔ریفائنری کو معمولی نقصان ہوا ہے ۔
ویب نیوز ’سبق‘ کے مطابق فائر بریگیڈ کے اہلکار آگ بجھانے کی کوشش کر رہے ہیں ۔ السینیا آئل ریفائنری کے اندر پٹرول ذخیرہ کرنے والے گودام پر میزائل لگنے کے بعد آگ بھڑک گئی ۔
عراقی عہدیداروں کا کہنا ہے کہ آئل ریفائنری میں لگنے والی آگ سے کوئی جانی نقصان نہیں ہوا ۔
یہ عراق کے شمالی صوبے صلاح الدین میں ملک کی سب سے بڑی آئل ریفائنری ’بیجی‘ کے قریب واقعہ ہے ۔
’آرٹی‘ کے مطابق ابھی یہ نہیں معلوم ہو سکا کہ آئل ریفائنری پر داغا جانے والا میزائل کس ساخت کا تھا اور اس کا حجم کتنا تھا ۔
عراق نے میزائل حملے کے بعد آئل ریفائنری میں کام بند کرا دیا۔ یہاں روزانہ 30 ہزار بیرل تیل صاف کیا جاتا ہے ۔
دہشتگرد تنظیم داعش نے حملے کی ذمہ داری قبول کرتے ہوئے دعویٰ کیا ہے کہ اس نے دو میزائل داغے تھے۔
