ویکسین کا ہولوکاسٹ سے موازنہ کرنے پر انگلینڈ میں دو افراد گرفتار

برطانوی پولیس نے جمعرات کو کورونا ویکسین کا موازنہ ہولوکاسٹ سے کرکے پمفلٹ تقسیم کرنے پر دو افراد کو  گرفتار کیا ہے۔

برطانوی خبر رساں ادارے روئٹرز کے مطابق برطانوی پولیس کا کہنا ہے کہ دونوں افراد کے بارے میں شبہ ہے کہ انہوں نے ایسے پمفلٹ تقسیم کیے جن میں کورونا ویکسین کا موازنہ ہولوکاسٹ سے کیا گیا تھا۔

پکڑے جانے والے افراد میں سے ایک کی عمر 37 جب کہ دوسرے کی عمر 73 سال ہے۔ دونوں پر جنوری کے آخر میں جنوبی لندن میں کتابچے تقسیم کرنے کا الزام ہے۔

برطانیہ ان دنوں ویکسینیشن کا ایک بڑا پروگرام شروع کرنے جا رہا ہے جبکہ ایک کروڑ سے زائد افراد کو ویکسین کی ابتدائی خوراک دے دی گئی ہے۔

دوسری جانب دارالحکومت میں ویکسین کے مخالفین کی جانب سے احتجاج بھی ہوتے رہے ہیں جبکہ ماہرین کا بھی یہ ماننا ہے کہ بڑی تعداد میں لوگ ویکیسن یا کورونا وائرس کے حوالے سے سازشی نظریات پر یقین کرتے ہیں۔

ان دونوں افراد کو پہلے بھی گرفتار کیا گیا تھا۔

73 سالہ شخص کو بے بنیاد اطلاعات پھیلا کر لوگوں میں پریشانی پیدا کرنے کے شبہے میں پکڑا گیا  جبکہ 37 سالہ شخص کو پبلک آرڈر آفنس کے تحت گرفتار کیا گیا تھا تاہم مارچ کے آغازمیں ان دونوں کو پولیس کی ضمانت پر رہا کر دیا گیا تھا۔