کورونا کے نئے کیسز آٹھ ماہ بعد پہلی مرتبہ ایک ہزار سے زیادہ

سعودی عرب میں منگل 20 اپریل کو آٹھ  ماہ بعد پہلی مرتبہ کورونا کے نئے کیسز ایک ہزار سے زیادہ سامنے آئے ہیں اور ایکٹیو کیسز نو ہزار سے بڑھ گئے ہیں۔

نئے کیسز میں 55 فیصد خواتین شامل ہیں۔ پچھلے سال اگست کے بعد اب یومیہ کورونا کیسز کی تعداد ایک ہزار سے بڑھ گئی ہے۔

سبق نیوز نے وزارت صحت کی جانب سے جاری بیان کے حوالے سے بتایا ہے کہ ’ گذشتہ 24 گھنٹوں کے دوران کورونا کے ایک ہزار 70 نئے مریض سامنے آئے جبکہ 940 افراد وائرس سے صحت یاب بھی ہوئے۔‘

وزرات صحت کے مطابق ’گذشتہ 24 گھنٹوں کے دوران کورونا کے مزید 12 مریض چل بسے، جس کے بعد مرنے والوں کی مجموعی تعداد چھ  ہزار 846 ہو گئی ہے۔‘

وزارت کا کہنا ہے کہ ’مملکت میں کورونا کے ایکٹیو کیسز کی تعداد نو ہزار 626 ہو گئی ہے، جن میں سے ایک ہزار 105 مریضوں کی حالت نازک ہے جو انتہائی نگہداشت کے یونٹس میں زیرعلاج ہیں۔‘

وزارت صحت کی جانب سے جاری ہونے والے اعداد و شمار کے مطابق ’سب سے زیادہ مریض ریاض ریجن میں سامنے آئے، جن کی تعداد 483 ہے جبکہ مکہ ریجن میں 209 افراد میں وائرس کی تصدیق ہوئی ہے۔‘

شرقیہ ریجن میں 157، مدینہ ریجن میں 44،عسیر ریجن میں 39، حائل ریجن میں 26، تبوک ریجن میں 26، جازان ریجن میں 25،  القصیم ریجن میں 20، الحدود الشمالیہ ریجن میں 11، نجران ریجن میں13، الجوف ریجن میں نو جبکہ الباحہ ریجن میں آٹھ مریض سامنے آئے ہیں۔

اب تک چار لاکھ سات ہزار 10 افراد میں کورونا وائرس کی تصدیق ہو چکی ہے جن میں سے تین لاکھ 90 ہزار 538 افراد شفایاب بھی ہوئے ہیں۔

وزارت صحت کا کہنا ہے کہ ’کورونا سے بچاؤ کے لیے مقررہ احتیاطی تدابیر پر عمل کرنا ضروری ہے، جن میں سماجی فاصلے کا اصول انتہائی اہم ہے۔‘