سعودی سفیر کی طاہر اشرفی اور وفاقی وزیر عمر ایوب سے ملاقات

چیئرمین پاکستان علما کونسل و نمائندہ خصوصی وزیراعظم برائے بین المذاہب ہم آہنگی و مشرق وسطیٰ مولانا طاہر محمود اشرفی نے پاکستان میں سعودی عرب کے سفیر نواف بن سعید المالکی سے ملاقات کی ہے۔

ملاقات کے بعد ایک بیان میں مولانا طاہر اشرفی نے کہا کہ ’پاکستان اور سعودی عرب کے تعلقات لازوال ہیں، وزیراعظم پاکستان کے دورہ سعودی عرب سے ان تعلقات کو نئی جہت ملے گی۔‘

 ’پاکستان سعودی عرب تعلقات ایمان اور عقیدے کے تعلقات ہیں، پاکستان اور سعودی عرب یک جان دو قالب ہیں۔‘

طاہر محمود اشرفی نے کہا کہ ’سعودی عرب امت مسلمہ کی وحدت اور اتحاد کا مرکز ہے، تمام مسلمانوں کے دل ارض حرمین شریفین کے ساتھ دھڑکتے ہیں۔‘ ’سعودی حکومت اور عوام مسلمانوں کے لیے جو خدمات سر انجام دے رہے ہیں اور کورونا کی وبا کے باوجود زائرین حرمین شریفین کے لیے سہولیات پیدا کی ہیں عالم اسلام اس پر سعودی عرب کی حکومت اور عوام کا شکر گزار ہے۔‘

طاہر محمود اشرفی نے سعودی ولی عہد کے ویژن 2030 کو پوری امت مسلمہ کے لیے خوش کن قرار دیا اور کہا کہ محمد بن سلمان کے ویژن 2030 سے نہ صرف سعودی عرب بلکہ پورا عالم اسلام مضبوط ہو گا۔‘

پاکستان میں سعودی عرب کے سفیر نواف بن سعید المالکی نے کہا کہ ’پاکستان اور سعودی عرب دو برادر ممالک ہیں، سعودی عرب کی قیادت اور عوام پاکستان کے عوام اور پاکستان سے بے حد محبت رکھتے ہیں۔‘

’وزیراعظم عمران خان کے دورہ سعودی عرب سے دونوں برادر اسلامی ممالک کے درمیان محبت و اخوت کے رشتے مزید مضبوط ہوں گے۔‘

پاکستان میں سعودی عرب کے سفیر نواف بن سعید المالکی نے اسلام آباد میں وزیر اقتصادی امور عمر ایوب خان سے بھی ملاقات کی۔

ملاقات کے بعد ایک ٹویٹ میں سعودی عرب کے سفیر کا کہنا تھا کہ ’مجھے وفاقی وزیر عمر ایوب سے ملاقات کر کے بہت خوشی ہوئی۔‘

انہوں نے کہا کہ ’بات چیت بہت خوش گوار ماحول میں ہوئی اور ہم نے دونوں ممالک کے تعلقات اور باہمی دپچسپی کے امور پر تبادلہ خیال کیا۔