موسم کی صورتحال: منگل کو کئی علاقوں میں بارش کہیں گرد آلود ہوائیں چلنے کا امکان

سعودی عرب میں موسمیات کے قومی مرکز نے کہا ہے کہ’ منگل کو عسیر، جازان، نجران اور باحہ میں گرد آلود ہوائیں چلنے، گرج چمک کے ساتھ بارش اور ژالہ باری کا امکان ہے‘۔

اخبار 24 کے مطابق قومی مرکز کا کہنا ہے کہ’ منگل کو مکہ مکرمہ ریجن کے متعدد مقامات خصوصا بالائی مقامات پر بارش ہوسکتی ہے‘۔

قومی مرکز نے توقع ظاہر کی ہے کہ’ گرد آلود ہواؤں سے جنوب مغربی پہاڑی مقامات پر حد نظر محدود ہوجائے گی۔ اس کا سلسلہ نجران تک پھیل جائے گا‘۔

ریاض کے جنوبی علاقے بھی متاثر ہوں گے۔ مکہ مکرمہ اور مدینہ منورہ ریجنوں میں بھی غبار آلود ہوائیں چلیں گی۔ 

بیان میں قومی مرکز نے بتایا کہ’ منگل کو سب سے زیادہ درجہ حرارت 47 سینٹی گریڈ حفر الباطن اور سب سے کم درجہ حرارت 13 سینٹی گریڈ السودہ میں رہے گا‘۔