سعودی عرب طائف میں الشریف عجائب گھر کے شائقین نوادر پر نظر پڑتے ہی ماضی کی دنیا میں کھو جاتے ہیں جہاں صدیوں پر محیط علاقے کی تاریخ ایک نظر میں سامنے آ جاتی ہے۔
سرکاری خبر رساں ایجنسی ایس پی اے کے مطابق الشریف عجائب گھر کے گائیڈ سیاحوں کے تمام سوالات کے جواب مدلل اور آسان زبان میں دینے کی کوشش کرتے ہیں۔ یہ پیشہ ور ٹورسٹ گائیڈ ہیں۔
الشریف عجائب گھر چھ ہزار مربع میٹر کے رقبے میں پھیلا ہوا ہے، جہاں قدیم چٹانوں سے بنی عمارتیں ہیں۔ ماضی قدیم کا فن تعمیر اپنی تمام تر رعنائیوں اور پرشوکت انداز میں سامنے آ جاتا ہے۔
ہر گھر میں لگا فانوس عجائب گھر کے محلوں کو روشن کیے رکھتا ہے۔ یہ ایسا منظر ہے جو عجائب گھر جانے والوں کو ماضی کی زندگی میں لے جاتا ہے۔
