کورونا کے کیسز میں مسلسل کمی، چوبیس گھنٹے میں 409 نئے مریض

سعودی عرب میں سنیچر 21 اگست کو کورونا کے 500 سے کم نئے مریض سامنے آئے ہیں جبکہ فعال کیسز کی تعداد میں بھی کمی آئی ہے۔ 

سنیچر کو سبق نیوز نے وزارت صحت کی جانب سے جاری بیان کے حوالے سے بتایا کہ ’گذشتہ 24 گھنٹوں کے دوران کورونا کے 409 نئے مریض سامنے آئے جبکہ 710 افراد صحت یاب بھی ہوئے۔‘

وزرات صحت کے مطابق ’گذشتہ 24 گھنٹوں کے دوران کورونا کے مزید 11 مریض چل بسے، جس کے بعد مرنے والوں کی مجموعی تعداد بڑھ کر آٹھ ہزار 469 ہو گئی ہے۔‘

وزارت کا کہنا ہے کہ ’مملکت میں کورونا کے فعال کیسز کی تعداد کم ہو کر 5 ہزار 242 ہو گئی ہے، جن میں سے ایک ہزار 162 مریضوں کی حالت نازک ہے جو انتہائی نگہداشت کے یونٹس میں زیرعلاج ہیں۔‘

وزارت صحت کی جانب سے جاری ہونے والے اعداد و شمار کے مطابق ’سب سے زیادہ مریض ریاض ریجن میں سامنے آئے، جن کی تعداد 125 ہے جبکہ مکہ ریجن میں 66 افراد میں وائرس کی تصدیق ہوئی۔‘

الشرقیہ ریجن 40، جازان ریجن میں 39، قصیم ریجن میں 29، عسیر ریجن میں 29، نجران ریجن میں 25، مدینہ ریجن میں 20، حائل ریجن میں 13، الحدود الشمالیہ میں 10، تبوک ریجن میں 9، الباحہ ریجن میں 7 اور الجوف ریجن میں 5 مریض سامنے آئے۔

اب تک پانچ لاکھ 41 ہزار 610 افراد میں کورونا وائرس کی تصدیق ہو چکی ہے، جن میں سے پانچ لاکھ 27 ہزار 899 افراد شفایاب بھی ہوئے ہیں۔

وزارت صحت کا کہنا ہے کہ ’کورونا سے بچاؤ کے لیے مقررہ احتیاطی تدابیر پر عمل کرنا ضروری ہے، جن میں سماجی فاصلے کا اصول انتہائی اہم ہے۔‘