امارات میں چوبیس گھنٹے کے دوران کورونا کے ایک ہزار77 نئے کیسز

متحدہ عرب امارات میں کورونا کے نئے کیسز مسلسل کم  ہورہے ہیں۔ جمعے کو پچھلے چوبیس گھنٹے کے دوران ایک ہزار77 نئے کیسز سامنے آئے ہیں۔

 نئے مریض مختلف قومیت سے ہیں، ان سب کی حالت مستحکم ہے اور انہیں ضروری علاج فراہم کیا جارہا ہے۔ متاثرین کی تعداد بڑھ کر 7 لاکھ 6 ہزار 166 ہوگئی ہے۔

امارات کی سرکاری خبر رساں ایجنسی وام نے وزارت صحت کے حوالے سے بتایا کہ ’پچھلے چوبیس گھنٹے کے دوران جدید تشخیصی آلات کی مدد سے کورونا کے مزید 3 لاکھ 18 ہزار 348 ٹیسٹ کیے گئے‘۔

بیان کے مطابق’ متاثرہ مریضوں میں سے مزید ایک ہزار 611 مکمل صحتیاب ہوگئے۔صحتیاب ہونے والوں کی تعداد بڑھ کر 6 لاکھ 86 ہزار 25 ہوگئی ہے‘۔

وزارت نے بتایا ہے کہ ’پچھلے چوبیس گھنٹے کے دوران زیرعلاج مریضوں میں سے مزید 3 چل بسے، مرنے والوں کی تعداد دو ہزار 12 ہوگئی‘۔

 وزارت نے عوام کو احتیاطی تدابیر اور سماجی فاصلے  کی پابندی جاری رکھنے کی پھر ہدایت کی ہے۔ 

علاوہ ازیں  وزارت صحت کے اعلان کے مطابق ’پچھلے چوبیس گھنٹے میں کورونا ویکسین کی مزید 59 ہزار 727 خوراکیں دی گئی ہیں ۔ اب تک ویکسین کی مجموعی طور پر ایک کروڑ 75 لاکھ 66 ہزار 410 خوراکیں دی جاچکی ہیں‘۔