وزیراعظم کا ابوظہبی کے ولی عہد، امیر قطر سے رابطہ، افعانستان کی صورتحال پر گفتگو

وزیراعظم عمران خان  نے ابوظبی کے ولی عہد اور متحدہ عرب امارات کی مسلح افواج کے ڈپٹی سپریم کمانڈر شیخ محمد بن زاید النہیان کے اور امیر قطرشیخ تمیم بن حمد آل ثانی سے ٹیلی فون  پر رابطہ کیا اور ان سے افغانستان کی تازہ ترین صورتحال پر گفتگو کی۔ 

پاکستان کے وزیراعظم ہاؤس سے جاری بیان میں کہا گیا ہے کہ وزیراعظم نے ابوظبی کے ولی عہد کے ساتھ ٹیلی فونک گفتگو میں کہا ہے کہ پرامن اور مستحکم افغانستان پاکستان اور خطے کے مفاد میں ہے۔

’افغانستان کا ایک جامع سیاسی تصفیہ یہاں کے لوگوں کے حقوق کا تحفظ یقینی بنانے کا بہترین راستہ ہے، عالمی برادری افغان عوام کی معاشی مدد اور تعمیر نو میں کردار ادا کرے۔‘

اس دوران دونوں رہنماؤں نے باہمی دلچسپی کے امور کے ساتھ ساتھ خطے کی صورتحال پر بھی تبادلہ خیال کیا۔

وزیراعظم نے اس موقع پر متحدہ عرب امارات کے ساتھ اپنے مضبوط برادرانہ تعلقات اور دونوں ممالک کے درمیان قریبی تعاون کی اہمیت کے عزم کا اعادہ کیا۔

افغانستان کی تازہ ترین صورتحال کے تناظر میں وزیراعظم نے زور دیا کہ پرامن اور مستحکم افغانستان پاکستان اور خطے کے وسیع تر مفاد میں ہے۔

وزیراعظم عمران خان نے عالمی برادری پر زور دیا کہ وہ افغان عوام کی معاشی مدد کرنے اور ملک کی تعمیر نو میں مدد کرے۔

انہوں نے کہا کہ افغانستان میں انسانی ضروریات کو پورا اور معاشی استحکام کو یقینی بنانے کی ضرورت ہے۔

وزیراعظم نے ایکسپو 2020 کے لیے بہترین انتظامات کرنے پر ولی عہد کو مبارکباد دی۔  انہوں نے اس میگا ایونٹ کی کامیابی کے لیے نیک خواہشات کا اظہار کیا۔ وزیراعظم اور ولی عہد نے باہمی دلچسپی کے تمام شعبہ جات میں تعاون بڑھانے کے لیے مل کر کام کرنے پر اتفاق کیا۔

امیر قطر سے وزیر اعظم عمران خان کا رابطہ

ریڈیو پاکستان کے مطابق وزیراعظم عمران خان اور امیر قطرشیخ تمیم بن حمد آل ثانی نے ٹیلی فونک گفتگو میں دو طرفہ تعلقات اور افغانستان کی بدلتی صورتحال پر تبادلہ خیال کیا۔

عمران خان نے کہا کہ ایک پرامن اور مستحکم افغانستان پاکستان اور خطے کے بہترین مفاد میں ہے۔ انہوں ںے کہا کہ 40 سال بعد افغانستان میں دیرپا امن قائم کرنے کا موقع ملا ہے تو مشکل کی اس گھڑی میں عالمی برادری کو معاشی طور پر اور افغانستان کی تعمیر نو کے لیے افغان عوام کا ساتھ دینا چاہیے۔

وزیراعظم عمران خان اور امیر قطر شیخ تمیم بن حمد آل ثانی کے درمیان ہونے والی ٹیلی فونک بات چیت میں دونوں رہنماؤں نے افغانستان میں سیاسی تصفیے کے ذریعے معاملات حل کرنے پر زور دیا۔