امیر کویت اور سعودی ولی عہد کی ملاقات، شہزادہ محمد بن سلمان کے لیے اعلٰی ترین اعزاز

 سعودی ولی عہد نائب وزیراعظم و وزیر دفاع شہزادہ محمد بن سلمان بحرین کا سرکاری دورہ مکمل کرکے جمعے کو منامہ سے خلیجی ممالک کے پانچویں اور آخری  مرحلے میں کویت پہنچ گئے۔

شہزادہ محمد بن سلمان نے منگل کو خلیجی ممالک کے دورے کا آغاز سلطنت عمان سے کیا تھا۔ 

کویتی ولی عہد شیخ مشعل الأحمد الصباح نے شہزادہ محمد بن سلمان کا خیرمقدم کیا۔

سعودی ولی عہد شہزادہ محمد بن سلمان نے امیر کویت شیخ نواف الاحمد الجابر الصباح سے  جمعے کو داریمامہ میں ملاقات کی۔

اس موقع پر کویتی ولی عہد شیخ مشعل الاحمد الجابر الصباح بھی موجود تھے۔ 

سعودی خبر رساں ادارے ایس پی اے اور کویتی خبر رساں ادارے کونا کے مطابق امیر کویت نے اس موقع پر شہزادہ محمد بن سلمان کو مبارک الکبیر شال اور کویت کا اعلٰی ترین اعزاز دیا ہے۔

یہ اعزاز دونوں برادر ملکوں کے درمیان اخوت کے رشتوں کے فروغ اور جی سی سی ممالک کے درمیان برادرانہ تعلقات کے استحکام ، مملکت میں امن و استحکام و ترقی و خوش حالی کےلیے منفرد  کوششوں کے اعتراف میں پردیا گیا۔  

کویت کے ایوان امیری کے وزیر شیخ محمد عبداللہ المبارک الصباح نے کہا کہ اس موقع پر کویت اور سعودی عرب کے برادرانہ تاریخی گہرے رشتوں دونوں ملکوں کے حکمران خاندانوں کے خصوصی تعلقات اور دونوں ملکوں کے برادر عوام کے درمیان قرابت، اخوت اور مشترکہ تعاون کا جائزہ لیا گیا۔  

 شیخ محمد الصباح  کے مطابق سعودی ولی عہد کے دورہ کویت پر کویتی قائدین اور عوام کی جانب سے دلی مسرت کا اظہار کیا۔

انہوں نے کہا کہ امیر کویت اور سعودی ولی عہد کے درمیان مشترکہ مفادات کے حصول کے لیے خلیجی تعاون کے نئے افق اور خلیجی عوام کی امنگوں کا بھی جائزہ لیا گیا ۔ ملاقات دوستانہ ، برادرانہ ماحول میں ہوئی۔

ملاقات میں فریقین نے مختلف سطحوں پر دونوں ملکوں کے درمیان مزید تعاون اور یکجہتی کی خواہش کا اظہار کیا ہے۔ 

سعودی ولی عہد کا سرکاری اور عوامی استقبال جوش وخروش سے کیا جا رہا ہے ۔ کویتی ٹاورز سعودی پرچموں اور ولی عہد کےلیے خیر مقدمی بینرز سے سجے ہوئے ہیں۔

کویتی وزیر خارجہ شیخ ڈاکٹر احمد ناصر الصباح نے کہا کہ شہزادہ محمد بن سلمان کے دورے سے دونوں برادر ملکوں کے مستحکم تعلقات کے قلعے میں ایک اور مضبوط اضافہ ہوگا۔  

یاد رہے کہ شہزادہ محمد بن سلمان کا یہ تیسرا دورہ کویت ہے۔ پہلی بار مئی 2015 اور دوسری بار 30 ستمبر 2018 کو برادر ملک کویت کے سرکاری دورے پر گئے تھے۔  

کویتی ولی عہد شیخ مشعل الأحمد الجابر الصباح یکم جون 2021 کو سعودی عرب کے دورے پر پہنچے تھے۔ یہ 7 اکتوبر 2020 کو ولی عہد کے منصب فائز ہونے کے بعد ان کا پہلا غیر ملکی دورہ تھا۔ 

کویت اور سعودی عرب 2018 میں کویتی سعودی رابطہ کونسل کے قیام کی اصولی دستاویز پر دستخط کر چکے ہیں۔  

شہزادہ محمد بن سلمان کے دورہ کویت کی مناسبت سے سعودی کویتی بزنس فورم میں سعودی اور کویتی کمپنیوں نے صنعت، توانائی اور تعمیرات کے شعبے میں چھ سٹریٹجک معاہدے کیے ہیں۔