سنگِ ماہ: ’پیش خدمت ہے عاطف اسلم بطور اداکار‘

پاکستان کے نامور گلوکار عاطف اسلم کے ڈیبیو ڈرامہ ’سنگ ماہ‘ کا ٹریلر ریلیز ہوا تو بہت سے صارفین کے لیے ’ہلمند‘ کے روپ میں دکھائی دینے والے عاطف اسلم کے ’ایکشن‘ حیرت جب کہ کچھ کے لیے دلچسی کا باعث رہے۔

نجی ٹیلی ویژن ہم نیٹ ورک کے ڈرامہ سیریل ’سنگ ماہ‘ میں اداکاری کے ساتھ عاطف اسلم پہلی مرتبہ ڈرامہ انڈسٹری کا حصہ بنے ہیں۔ نعمان اعجاز، کبریٰ خان اور ہانیہ عامر سمیت متعدد بڑے ناموں کے ڈرامے کا ابتدائی ٹریلر ریلیز ہوا تو متعدد ٹویپس نے اسے یادرگار لمحہ قرار دیا۔

پاکستان کے ساتھ ساتھ انڈیا میں بھی ٹرینڈز لسٹ اور ٹائم لائنز پر عاطف اسلم اور ان کے پہلے ڈرامے کا ذکر کیا جاتا رہا۔ اس دوران صارفین نے جہاں ڈرامے سے متعلق اپنی توقعات کا اظہار کیا بلکہ گانے اور فلموں کے بعد ڈراموں میں ان کی انٹری کو عاطف اسلم کے ٹیلنٹ کے ثبوت کے طور پر پیش کرتے رہے۔

ٹوئٹر صارف عادیز نے ’سنگ ماہ‘ کا پوسٹر ریلیز ہونے کے بعد عاطف اسلم کے انڈیا میں ٹرینڈ کرنے کا ذکر کرتے ہوئے ٹرینڈز لسٹ کی تصویر بھی شیئر کی۔

مدیحہ نامی ٹویپ نے عاطف اسلم کے ساتھ ’سنگ ماہ‘ میں کام کرنے والی اداکارہ کبریٰ خان کا بھی ذکر کیا تو دونوں کی تصویر شیئر کرتے ہوئے کیپشن میں ’محفل رنگین ہے، معاملہ سنگین ہے‘ کا تبصرہ سجایا۔

کسی نے ڈرامے کے مناظر میں عاطف اسلم کو دیکھ کر سکرین شاٹ شیئر کرتے ہوئے ’ملٹی ٹیلنٹڈ‘ کا کیپشن سجایا تو کوئی اسے آغاز سے قبل ہی کامیاب ڈرامہ ٹھہراتا رہا۔

انڈین صارفین نے عاطف اسلم کا ذکر کیا تو ٹوئٹر صارف ساکشی نے بالی وڈ کو مخاطب کرتے ہوئے لکھا کہ ’پلیز انہیں انڈسٹری میں واپس لیا جائے۔‘

پاکستانی ٹویپ سمیر ملک کو بالی وڈ سے متعلق اپیل نہ بھائی تو انہوں نے انڈین صارف کو مخاطب کرتے ہوئے لکھا کہ ’بہت دیر ہوگئی، ہم لاہور میں اپنی انڈسٹری بنا رہے ہیں۔ اب آپ کو صارف بننا ہوگا اور ہم کاپی رائٹس کے ساتھ مالک ہوں گے۔‘

عاطف اسلم کا پہلا ڈرامہ ’سنگ ماہ‘ اور اس کا ٹیزر خصوصاً ’ایک طرف روس ہے، ایک طرف چین ہے، معاملہ سنگین ہے‘ ٹائم لائنز پر ایک ایسی کیفیت میں زیر بحث ہے جب شائقین اس بات کے منتظر ہیں کہ ان کے پسندیدہ گلوکار اس مرتبہ اپنی ادکاری کے ساتھ کیسے انصاف کرتے ہیں۔

چند ہفتے قبل عاطف اسلم کی جانب سے اپنے انسٹاگرام اکاؤنٹ پر ڈرامہ ڈیبیو کا ذکر کرتے ہوئے ایک ویڈیو میں اپنے اس تجربے سے متعلق خیالات کا اطہار کیا گیا تھا۔

عاطف اسلم کا ڈرامہ ’سنگ ماہ‘ 2016 میں جاری کردہ ’سنگ مرمر‘ کا سیکوئل ہے جس میں کبریٰ خان، ثانیہ سعید، نعمان اعجاز اور میکال ذوالفقار نے پرفارم کیا تھا۔

’سنگ ماہ‘ کو رواں ماہ کے اختتام پر ریلیز کیے جانے کی توقع ہے۔