الیکشن کمیشن نے ضابطہ اخلاق کی خلاف ورزی کے کیس میں وفاقی وزیر علی امین گنڈا پور کے بھائی عمر امین گنڈا پور کو نااہل قرار دے دیا ہے۔
فیصلے کے بعد عمر امین اب ڈیرہ اسماعیل خان سے سٹی میئر کی نشست پر تحریک انصاف کے امیدوار کے طور پر انتخابات نہیں لڑ سکیں گے۔ علی امین کو 50 ہزار جرمانہ بھی کیا جا چکا ہے۔
کمیشن نے علی امین گنڈا پور کو ڈیرہ اسماعیل خان جانے کی اجازت دیتے ہوئے انتخابی مہم میں حصہ لینے سے روک دیا ہے۔
مزید پڑھیں
-
علی امین گنڈا پور نے فضل الرحمان کو کیا چیلنج دیا؟Node ID: 288756 -
-
چیف الیکشن کمشنر کی سرابرہی میں تین رکنی کمیشن نے کیس کی سماعت کی۔
الیکشن کمیشن نے علی امین گنڈا پور کو خاندان کی تقریبات میں شرکت کےلیے ڈیرہ اسماعیل خان جانے کی اجازت دی ہے۔ تاہم انہیں ضابطہ اخلاق پر سختی سے عمل درآمد کی ہدایت کی گئی۔
فیصلے میں کہا گیا ہے کہ علی امین گنڈا پور انتخابی عمل میں شرکت نہ کرنے کو یقینی بنائیں۔
فیصلے کے مطابق علی امین گنڈا پور نے دوبارہ خلاف ورزی کی تو سخت کارروائی ہوگی۔
وزیراعظم عمران خان کے معاونِ خصوصی برائے سیاسی روابط ڈاکٹر شہباز گل نے اس معاملے پر ٹویٹ کرتے ہوئے کہا کہ الیکشن کمیشن کے فیصلے کو سپریم کورٹ میں چیلنج کریں گے۔
انہوں نے مزید کہا کہ بارہ صفحات کے فیصلے میں عمر امین گنڈا پور کے خلاف کوئی واضح ثبوت نہیں ملا۔
علی امین گنڈا پور کے بھائی عمر امین گنڈاپور کی نااہلی کا 12 صفحات میں کوئی واضح ثبوت عمر امین پر پڑھنے کو نہیں ملا۔اس طرح کے حالات میں اس قدر سخت سزا سمجھ میں نہ آنے والی چیز ہے۔ ہم عمر امین کے بارے الیکشن کمیشن کے فیصلے کو سپریم کورٹ آف پاکستان میں اپیل دائر کر کے چیلنج کریں گے
— Dr. Shahbaz GiLL (@SHABAZGIL) February 7, 2022
