عازمین حج کی تربیت کے لیے ٹریننگ سیشن کا آغاز8 اپریل سے ہوگا: وزارت مذہبی امور
جمعرات 3 اپریل 2025 12:00
وزارت مذہبی امور کے مطابق تمام عازمین حج کے لیے تربیتی پروگرام میں شرکت کرنا لازمی ہے۔ (فوٹو: فیس بک)
پاکستان بھر میں حج 2025 کے عازمین کی تربیت کے لیے ٹریننگ سیشن کے دوسرے مرحلے کا آغاز8 اپریل سے شروع ہو گا۔
سرکاری خبر رساں ادارے اے پی پی کے مطابق وزارت مذہبی امور کے ترجمان کا کہنا ہے کہ تمام عازمین حج اپنی تربیتی ورکشاپس کے شیڈول کے لیے حج موبائل ایپ پر ہدایات کا انتظار کریں۔
ترجمان کا کہنا ہے کہ تربیت کا پہلا مرحلہ رمضان المبارک سے قبل مکمل ہو چکا ہے۔ دوسرے مرحلے کے تربیتی پروگرام کی تاریخ اور جگہ کی معلومات تمام عازمین حج کو بذریعہ موبائل پیغام اور پاک حج ایپ پر فراہم کر دی جائیں گی۔
انہوں نے کہا کہ تمام عازمین حج کے لئے تربیتی پروگرام میں شرکت کرنا لازمی ہے۔
ترجمان نے کہا کہ عازمین حج بائیو میٹرک کے لیے از خود اعتماد آفس مت جائیں بلکہ پاک حج موبائل ایپ پر شیڈول اور اوقات کے سلسلہ میں ہدایات کا انتظار کریں۔
جن عازمین حج کی سعودی ویزہ کے حصول کے لیے بائیو ایپ سے بائیو میٹرک ہو چکی ہے وہ اس سے مستثنیٰ ہوں گے۔
