سعودی عرب سے پہلا آئل ٹینکر مارچ کے تیسرے ہفتے میں پاکستان پہنچے گا

پاکستان میں سعودی عرب کے سفیر نواف بن سعید المالکی اور سعودی ڈیویلپمنٹ فنڈ (ایس ایف ڈی) کے ڈائریکٹر جنرل ڈاکٹر سعود الہاشمی نے اسلام آباد میں وزیر برائے اقتصادی امور عمر ایوب سے ملاقات کی۔

بدھ کو وزارت کی جانب سے جاری پریس ریلیز کے مطابق دونوں اطراف نے سعودی آئل فیسیلٹی سمیت باہمی معاشی تعاون، جاری ترقیاتی منصوبوں اور نئے پراجیکٹس پر گفتگو کی۔ عمر ایوب نے پاکستان کی معاشی ترقی کے لیے ایس ایف ڈی کی تکنیکی اور مالی مدد کا شکریہ ادا کیا۔

وزیر برائے اقتصادی امور نے ایک اعشاریہ 20 ارب ڈالر کی لاگت سے تیار ہونے والی سعودی آئل فیسیلٹی کا کام بروقت شروع ہونے پر بھی شکریہ ادا کیا۔ اس کے ذریعے ایک سال تک ڈیفرڈ پیمنٹ کی بنیاد پر پیٹرولیم مصنوعات درآمد کی جا سکیں گی۔

اس معاہدے کے تحت پاک عرب ریفائنری لمیٹڈ (پارکو) اور نیشنل ریفائنری لمیٹڈ (این آر ایل) ہر ماہ سعودی عرب سے 10 کروڑ ڈالر کی پیٹرولیم مصنوعات درآمد کرسکیں گی۔

پریس ریلیز کے مطابق سعودی آئل فیسیلٹی کے تحت سعودی عرب سے پہلا آئل ٹینکر مارچ کے تیسرے ہفتے میں پاکستان پہنچے گا۔

’سعودی سفیر نے دونوں برادرانہ ممالک کے درمیان باہمی معاشی تعاون کو مضبوط کرنے کےلیے ہر سطح پر مزید مدد کی یقین دہانی کروائی۔‘

اس وقت ایس ایف ڈی پاکستان میں انرجی، صحت، تعلیم، انفراسٹرکچر اور ہاؤسنگ میں مالی امداد کر رہی ہے اور اس ملاقات میں ان تمام پراجیکٹس پر بات کی گئی۔