یوکرین میں پکڑے گئے برطانوی جنگجوؤں کی دیکھ بھال کر رہے ہیں: روس

روس کی وزارت خارجہ نے کہا ہے کہ ’یوکرین میں گرفتار کیے گئے برطانوی جنگجوؤں کو کھانا کھلایا جا رہا ہے، پانی پلایا جا رہا ہے اور ضروری مدد دی جا رہی ہے۔‘

برطانوی خبر رساں ایجنسی روئٹرز کے مطابق وزارت خارجہ کی ترجمان ماریہ زاخارووا نے کہا ہے کہ ’پریشان نہ ہوں، روس ان کی دیکھ بھال کر رہا ہے۔ انہیں (کھانا) کھلایا جاتا ہے، پانی پلایا جاتا ہے اور ضروری امداد دی جاتی ہے۔ بالکل دوسرے غیر ملکیوں کی طرح جنہوں نے ہتھیار ڈال دیے ہیں یا حراست میں لے لیے گئے ہیں۔‘

روسی افواج کے ہاتھوں یوکرین میں پکڑے گئے دو برطانوی جنگجو پیر کو روسی سرکاری ٹی وی پر نظر آئے تھے۔

صدر ولادیمیر پوتن کے یوکرینی اتحادی کے بدلے ان جنگجوؤں کا تبادلہ کرنے کو کہا گیا ہے جسے یوکرینی حکام نے حراست میں لے رکھا ہے۔

دوسری جانب یوکرین کا دوسرا سب سے بڑا شہر خارکیف شدید بمباری کی زد میں ہے۔

میئر ٹیریخوف نے جمعرات کو ایک ٹیلی ویژن خطاب میں بتایا کہ ’بڑے دھماکے،روسی فیڈریشن شہر پر اشتعال انگیز بمباری کر رہا ہے۔‘

انہوں نے کہا کہ شمال مشرقی شہر میں تقریباً 10 لاکھ لوگ موجود ہیں جبکہ تقریباً 30 فیصد آبادی نقل مکانی کر چکی ہے جن میں زیادہ تر خواتین، بچے اور بزرگ شامل ہیں۔