’تکنیک ہی غلط ہے‘، ویڈیو نے طنز و مزاح کے رنگ بکھیر دیے

سابق وزیراعظم عمران خان کی ایک ویڈیو سوشل میڈیا پر وائرل ہے جسے دیکھ کر اندازہ ہوتا ہے کہ وہ میڈیا کے ساتھ اپنے انٹرویوز کو انتہائی سنجیدہ لیتے ہیں اور انٹرویو کے تکنیکی پہلوؤں پر بھی گہری نگاہ رکھتے ہیں۔

وزیراعظم عمران خان نے ہفتے کے روز ویڈیو لنک کے ذریعے بیرون ملک مقیم اپنے حامیوں سے خطاب کیا تھا اور سوشل میڈیا پر وائرل ہونے والی ویڈیو ان کی اس خطاب سے کچھ منٹوں قبل اپنے لوگوں سے ہونے والی بات چیت ہے۔

اس ویڈیو میں عمران خان کو اپنے حالیہ انٹرویوز کا حوالہ دیتے ہوئے دیکھا جاسکتا ہے۔

وہ کہتے ہیں کہ ’اے آر وائے کی زبردست فوٹوگرافی تھی، اس کی تصویر بڑی اچھی تھی۔ شان کا تو ایسا لگ رہا تھا جیسے وہ انٹرویو کسی ویٹنگ بس روم میں کیا جارہا ہے، نہ اس کی تصویر اچھی تھی۔‘

واضح رہے کچھ دن پہلے سابق وزیراعظم عمران خان کا پاکستانی اداکار شان کے ساتھ انٹرویو پاکستانی چینل ’ہم نیوز‘ پر نشر کیا گیا تھا۔

شان کے ساتھ اپنے انٹرویو پر تبصرہ کرتے ہوئے عمران خان کہہ رہے تھے کہ ’لائٹنگ اس کی بڑی گندی تھی۔‘

پاکستان سوشل میڈٰیا صارفین بھی سابق وزیراعظم کے حالیہ انٹرویوز پر تبصرے سے خوب محظوظ ہو رہے ہیں اور اپنی رائے کا اظہار کررہے ہیں۔

صحافی طارق متین کے مطابق عمران خان کی ویڈیو جس میں شان شاہد کے ساتھ ہونے والے انٹرویو کی بات کررہے ہیں کوئی اچنبھے کی بات نہیں۔

ان کا کہنا ہے اس مرتبے کے لیڈر کو ہر چیز پر فوکس کرنا چاہیے۔

انایا خان نامی صارف نے ایک ٹویٹ میں طنزیہ لکھا کہ ’شان بھی خراب لائٹنگ مہیا کرکے عمران خان کے خلاف بین الاقوامی سازش میں شامل ہوگئے ہیں۔‘

سوشل میڈیا پر کچھ صارفین ایسے بھی ہیں جو اپنی بات کہنے اور طنز و مزاح کے رنگ بکھیرنے کے لیے میمز کا سہارا لیتے ہوئے نظر آئے۔

تیموز زمان نامی صارف نے ایک میم شیئر کی جس میں ایک شخص کہہ رہا تھا ’تکنیک ہی غلط ہے تمہاری‘۔

واضح رہے سابق وزیراعظم عمران خان نے نئی حکومت کے خلاف احتجاج کا اعلان کا رکھا ہے اور وہ مختلف شہروں میں جلسے منعقد کررہے ہیں جس کا مقصد ان کے مطابق اسلام آباد کی طرف مارچ کی تیاری ہے۔