راولپنڈی، کریکٹر سرٹیفکیٹ کے لیے پولیس سینٹر آنے والا قتل کا اشتہاری ملزم گرفتار

راولپنڈی پولیس نے 2011 سے قتل کے مقدمے میں اشتہاری ایک ملزم کو منگل کو اس وقت گرفتار کیا جب وہ کریکٹر سرٹیفکیٹ بنوانے کے لیے پولیس خدمت مرکز راولپنڈی پہنچا۔

راولپنڈی پولیس کے ترجمان انسپکٹر سجاد الحسن نے اردو نیوز کو بتایا کہ ضلع اٹک کی تحصیل حسن ابدال میں جائیداد کے تنازع پر احمد خان نامی ملزم نے 2011 میں فائرنگ کرکے ایک شخص کو قتل کر دیا تھا۔

ان کے مطابق قتل کی واردات کے بعد ملزم فرار ہوگیا تھا۔

عدالت نے ملزم کو اس مقدمے میں اشتہاری قرار دے دیا تھا اور گزشتہ 11 برس سے قتل کے اس مقدمے میں وہ اٹک پولیس کو مطلوب تھا۔

انسپکٹر سجاد الحسن کے مطابق ملزم واردات کے بعد فرار ہو کر بیرون ملک چلا گیا تھا۔ حالیہ دنوں میں وہ ملک واپس آیا اور کسی قانونی تقاضے کے لیے ان کو کریکٹر سرٹیفکیٹ کی ضرورت پڑی۔

’ملزم کریکٹر سرٹیفکیٹ بنوانے کے لیے پولیس خدمت مرکز لیاقت باغ  پہنچا۔ پولیس نے کریکٹر سرٹیفکیٹ کے لیے جب درخواست گزار کے کوائف اور متعلقہ تفصیلات کی جانچ پڑتال کی تو پتا چلا کہ وہ اٹک پولیس کو 11 سال سے قتل کے مقدمے میں مطلوب ہے۔‘

سجاد الحسن نے بتایا کہ صوبے کے اشتہاری اور دوسرے ملزم کا ڈیٹا پنجاب پولیس کے پاس مربوط نظام کے تحت میسر ہے اور صوبے بھر کی پولیس کو اس ڈیٹا تک رسائی ہے جس کی وجہ سے اشتہاری ملزمان کی گرفتاری اور جرائم کے خاتمے میں بہت مدد ملتی ہے۔‘

 ان کا کہنا ہے کہ پولیس جرائم کے خاتمے کے لیے جدید ٹیکنالوجی کا مؤثر استعمال کر رہی ہے۔

راولپنڈی پولیس کا کہنا ہے کہ ملزم کو قانونی تقاضے پورے کر کے اٹک پولیس کے حوالے کیا جائے گا۔

دوسری جانب ایس ایس پی آپریشنز راولپنڈی وسیم ریاض خان نے پولیس خدمت مرکز لیاقت باغ کے اہلکار کو اشتہاری ملزم کی گرفتاری میں مستعدی کا مظاہرہ کرنے پر شاباش دی۔

ایس ایس پی نے ہدایت کی کہ اشتہاری ملزمان کے خلاف کارروائیوں کا سلسلہ جاری رکھا جائے گا۔