ریاض میں سعودی لڑکیوں کو ہتھیار دکھا کر دھمکانے اور مارپیٹ پر 3 افراد گرفتار

سعودی دارالحکومت ریاض میں دوسعودی لڑکیوں کو ہتھیارکے بل پر دھمکانے اور مارپیٹ کی وڈیو سوشل میڈیا پروائرل ہے۔

وائرل وڈیومیں دیکھا جاسکتا ہے کہ ایک عوامی ادارے کے سامنے خواتین جمع ہیں۔ نوک جھونک کے بعد مارپیٹ شروع ہوگئی۔

العربیہ نیٹ کے مطابق ریاض پولیس نے بتایا کہ ’سعودی لڑکیوں پر حملے میں شامل تین افراد کو حراست میں لیا گیا ہے‘۔

 ریاض پولیس کے ترجمان نے بتایا کہ’ متاثرہ لڑکیوں نے شکایت درج کرائی تھی کہ ان پر دوخواتین نے حملہ کیا جبکہ ایک شخص نے ہتھیار دکھا کر دھمکی دی اور پھر تینوں فرار ہوگئے‘۔ 

پولیس ترجمان کا کہنا ہے کہ’ تینوں کو گرفتار کرلیا گیا۔ ان میں سے دو سعودی خواتین ہیں جبکہ ایک مقامی شہری ہے۔ پوچھ گچھ کی کارروائی مکمل کرلی گئی‘۔

سوشل میڈیا کے صارفین نے واقعہ پر برہمی کا اظہار کیا ہے۔