سعودی عرب کے فرمانروا شاہ سلمان نے عیدالاضحیٰ کے موقعے پر اپنے پیغام میں کہا ہے کہ کورونا وائرس کی وبا کے خلاف مثبت اقدامات کی وجہ سے رواں برس عازمین حج کی تعداد میں 10 لاکھ تک پہنچی ہے۔
عرب نیوز کے مطابق سرکاری ٹی وی پر اپنے خطاب میں شاہ سلمان نے مسلم دنیا کو عید کی مبارکباد دیتے ہوئے کہا کہ اب بھی حجاج کی حفاظت کو یقینی بنانے کے لیے احتیاطی تدابیر کو مدنظر رکھا جا رہا ہے۔
شاہ سلمان نے اللہ سے دعا کی کہ وہ تمام عازمین کا حج قبول فرمائے۔ انہوں نے حج کے امور اور انتظام دیکھنے والوں کی کوششوں کو بھی سراہا۔
حجاج عرفات کے بعد منیٰ پہنچ گئے ہیں۔ اگلے چند دنوں تک مناسک حج ادا کرتے رہیں گے۔
کورونا وائرس کی وبا کے بعد رواں برس عازمین حج کی تعداد 10 لاکھ تک پہنچی ہے۔
2020 میں کورونا وائرس کی وبا کے دوران مملکت نے صرف ایک ہزار افراد کو حج کی اجازت دی تھی۔ 2021 میں حجاج کی تعداد 60 ہزار تھی اور ان کی کورونا وائرس کے خلاف مکمل ویکسینیشن ہوئی تھی۔
