طائف میں شہابیوں کی بارش جمعرات کو ہوگی

طائف میں شہابیوں کی بارش کا موسم شروع ہو چکا ہے جسے دیکھنے کے لیے ملک بھر سے شائقین پہنچ رہے ہیں۔

سبق ویب سائٹ کے مطابق فلکی علوم کی کمیٹی نے شہابیوں کی بارش کا نظارہ کرنے کے لیے خصوصی اہتمام کیا ہے۔

فلکیاتی علوم کی کمیٹی کے سربراہ ڈاکٹر شرف السفیانی نے کہا ہے کہ ’جمعرات اور جمعہ کی درمیانی شب  شہابیوں کی بارش کے عروج کی رات ہے۔‘

انہوں نے کہا ہے کہ ’طائف میں ہر سال 17 جولائی سے 24 اگست تک وقفے وقفے سے شہابیوں کی بارش ہوتی ہے۔‘

ڈاکٹر شرف السفیانی کے مطابق ’جمعرات کو رات 12 بجے سے 4 بجے فجر تک ایک گھنٹے کے دوران 150 شہابیے دیکھے جائیں گے۔‘

انہوں نے کہا کہ ’شہابیوں کی بارش کا نظارہ کرنے کے لیے دوربین کی ضرورت نہیں ہو گی۔‘

ڈاکٹر شرف السفیانی کا مزید کہنا تھا کہ ’شہابیوں کی بارش کا نظارہ کرنے کے خواہشمند کمیٹی کے ٹوئٹر اکاؤنٹ پر تفصیلات حاصل کرسکتے ہیں۔‘