مملکت میں بے روزگاری کی شرح میں ریکارڈ کمی  

سعودی وزارت سرمایہ کاری نے کہا ہے کہ گزشتہ 10 برس میں پہلی بار مملکت میں بے روزگاری کی شرح میں ریکارڈ کمی واقع ہوئی ہے۔

عاجل ویب سائٹ کے مطابق وزارت سرمایہ کاری نے بیان میں کہا کہ سال رواں 2022 کی پہلی سہ ماہی کے دوران بے روزگاری کی شرح 10.1 فیصد کمی ہوئی ہے۔

وزارت سرمایہ کاری کا کہنا ہے کہ ’گزشتہ 10 سال کے اعدادوشمار کے تناظر میں یہ سعودی شہریوں میں بے روزگاری کی شرح میں ریکارڈ کمی ہے۔‘

 وزارت سرمایہ کاری نے مملکت میں سال رواں کی دوسری سہ ماہی کے دوران ہونے والی نئی اقتصادی و سرمایہ کاری تبدیلیوں کا جائزہ بھی جاری کیا ہے۔

 وزارت نے بتایا کہ ’سال رواں کی دوسری سہ ماہی کے دوران مجموعی سرمایہ کاری کے 112 فیصد اہداف حاصل کر لیے گئے۔ 738 ارب ریال کی سرمایہ کاری ہوئی جو 2021 کی مجموعی قومی پیداوار کے حوالے سے 23.6 فیصد کے لگ بھگ ہے۔‘

مملکت نے ملکی سرمایہ کاری کے 104 فیصد اہداف حاصل کیے۔ 638 ارب ریال تک کی سرمایہ کاری ہوئی ہے۔ براہ راست غیرملکی سرمایہ کاری 72 ارب ریال تک پہنچ گئی جو اس حوالے سے مقررہ اہداف کا  172 فیصد ہے۔

محکمہ شماریات کی جانب سے  جاری کردہ اعدادوشمار کے مطابق ’سال رواں کی دوسری سہ ماہی میں مملکت کی حقیقی مجموعی قومی پیداوار کی 11.8 فیصد شرح نمو ریکارڈ کی گئی ہے۔‘

تیل سے 23.1 فیصد اور تیل کے ماسوا سرگرمیوں سے 5.4 فیصد شرح نمو ہوئی ہے۔ 

دوسری سہ ماہی کے دوران سالانہ کی بنیاد پر افراط زر کی شرح 2.3 فیصد ریکارڈ کی گئی۔ تعلیمی اخراجات میں 6.2 فیصد اور کھانے پینے کی اشیا میں 4.3 فیصد کا اضافہ ہوا ہے۔