پی آئی اے کی فلائٹ میں عجیب حرکتیں کرنے پر ایک شخص دبئی سے ڈی پورٹ

پاکستان انٹرنیشنل ایئرلائن (پی آئی اے) کے ترجمان نے پشاور سے دبئی جانے والی پرواز میں پیش آنے والے واقعے کے حوالے سے وضاحت کرتے ہوئے کہا ہے کہ 14 ستمبر کو ایک مسافر نے اچانک عجیب و غریب حرکتیں شروع کر دیں، جس کو پکڑ کر دبئی سکیورٹی حکام کے حوالے کیا کر دیا گیا تھا اور اس کو اگلے روز ڈی پورٹ کر دیا گیا۔

پیر کو ٹوئٹر پر صالح مغل نامی صارف ایک ایسی ویڈیو شیئر کی جس میں دیکھا جا سکتا ہے کہ بنیان پہنے ایک شخص سے فلائٹ کا عملہ بات چیت کر رہا ہے، اس دوران وہ سیٹ پر چڑھ کر ونڈو کو زور سے لات مارتا ہے۔

صالح مغل نے ساتھ لکھا کہ ’پشاور سے دبئی جانے والے پی آئی اے کے جہاز میں مسافر نے عجیب و غریب حرکتیں کر کے عملے کر پریشان کیا اور کھڑکی بھی توڑنے کی کوشش کی۔ اس کو عملے کے ارکان نے قابو کر کے باندھ دیا۔‘

اس کے بعد پی آئی اے کے ترجمان کی جانب سے جاری بیان میں بتایا گیا ہے کہ 14 ستمبر کو پشاور سے دبئی جانے والی پرواز پی کے 283 میں اڑان کے بعد اسامہ عبداللہ نامی مسافر نے عجیب وغریب حرکتیں شروع کر دیں اور سیٹوں پر لاتیں اور مکے برسانا شروع کر دیے۔

ترجمان کے مطابق ’مسافر کو روکنے کی کوشش کی گئی تو اس نے عمران جاوید نامی عملے کے رکن پر حملہ کرنے کی بھی کوشش کی۔‘

عملے کی جانب سے پائلٹ کو آگاہ کیا گیا جنہوں نے مسافر کو سمجھانے کی کوشش کی ۔ اس دوران مسافر نے ونڈو پر لات مار کر اس کے شٹر کو نقصان پہنچایا۔

ترجمان کا کہنا ہے کہ ‘بڑی مشکل سے مسافر کو قابو کیا گیا اور ہاتھ پیر باندھے گئے، جس کے بعد وہ پورے سفر کے دوران سویا رہا۔‘

’لینڈنگ کے بعد دبئی ایئرپورٹ پر موجود سکیورٹی سٹاف کو آگاہ کیا گیا، جس کے ارکان نے اسامہ عبداللہ نامی اس مسافر کو گرفتار کر لیا اور تمام جانچ پڑتال کے بعد اگلے روز ڈی پورٹ کر دیا گیا۔