سرگن مہتا بھی پاکستانی ڈراموں کی دلدادہ

انڈین فلم انڈسٹری کی پنجابی اداکارہ سرگن مہتا بھی پاکستانی ڈراموں کی دلدادہ نکل آئی ہیں۔ سرگن مہتا نے اپنی فلم ’بابے بھنگڑا پاؤندے نے‘ کی تشہیر کے دوران اپنے انٹرویو میں پاکستانی ڈراموں کی تعریف کی۔

سرگن مہتا نے پاکستانی ڈراموں کے بارے میں کہا تھا کہ ’میں بہت زیادہ پاکستانی ڈرامے دیکھتی ہوں اور مجھے سب سے زیادہ پسندیدہ ڈرامے ’میرے پاس تم ہو‘ اور ’رقیب سے‘ ہیں۔‘

اسی سلسلے میں فوٹو اینڈ ویڈیو شیئرنگ پلیٹ فارم انسٹاگرام پر شوبز کے ایک اکاؤںٹ کی جانب سے پوسٹ کو پاکستانی اداکارہ اقرا عزیز نے اپنی سٹوری پر لگایا اور سرگن مہتا کو ٹیگ کرکے شکریہ ادا کیا۔

جس پر سرگن مہتا نے اپنی سٹوری میں کہا کہ ’اقراء مجھے آپ سے اور آپ کے کام سے بہت پیار ہے۔‘

اس کے جواب میں ’سنو چندا‘ کی جیا نے لکھا کہ ’میں بابے بھنگڑا پاؤندے نے دیکھنے کے لیے بے تاب ہوں۔‘

پاکستانی اداکاروں اور انڈین پنجابی اداکاروں کے درمیان یہ دوستی اور پیار کوئی پہلی مرتبہ دیکھنے میں نہیں آیا۔

کچھ روز پہلے انڈیا کی پنجابی اداکارہ سونم باجوہ نے اپنے انٹرویو میں کہا تھا کہ ’وہ جس سے افیئر چلانا چاہتی تھیں، ان کی شادی ہوچکی ہے۔‘

جب میزبان نے ان سے نام پوچھا تو انہوں نے فواد خان کا نام بتایا۔

سرگن مہتا کی نئی فلم ’بابے بھنگڑا پاؤندے نے‘ 5 اکتوبر کو ریلیز کی گئی تھی جسے فلم بین کافی پسند کر رہے ہیں۔

اس فلم کی سب سے خاص بات پاکستانی اداکار سہیل احمد کی فلم میں مرکزی کاسٹ کے طور پر اداکاری تھی۔