’ٹک ٹک کیوں کررہے ہیں؟‘ نیٹ رن ریٹ بہتر نہ کرنے پر تنقید

پاکستان نے آسٹریلیا میں جاری ٹی 20 ورلڈ کپ میں نیدرلینڈز کو چھ وکٹوں سے شکست دے کر میگا ایونٹ میں دو پوائنٹس اپنے نام کرلیے ہیں۔

نیدرلینڈز نے پہلے بیٹنگ کرتے ہوئے مقررہ 20 اوورز میں پاکستان کو 92 رنز کا ہدف دیا تھا جو گرین شرٹس نے 15 ویں اوور میں حاصل کرلیا۔

پاکستان کی جیت کے بعد سوشل میڈیا پر ایک بار پھر کئی کھلاڑی صارفین کی توجہ کا مرکز بنے ہوئے ہیں۔ ہر میچ کی طرح اس میچ میں بھی فاسٹ بولر حارث رؤف گفتگو کا موضوع رہے۔

نیدرلینڈز کی اننگز کے چھٹے اوور میں حارث رؤف کی ایک برق رفتار باؤنسر باس ڈی لیڈے کے ہیلمٹ پر لگی جس سے نیدرلینڈز کے بیٹر کی دائیں آنکھ کے نیچے شدید چوٹ آئی اور انہیں گراؤنڈ چھوڑ کر واپس پویلین جانا پڑا۔

نیدرلینڈز کے بیٹر کی تصاویر سوشل میڈیا پر وائرل ہوئیں تو فرید خان یہ پوچھنے پر مجبور ہوگئے کہ ’حارث رؤف یہ آپ نے کیا کیا؟‘

پاکستانی کپتان بابر اعظم اب تک ٹی 20 میں کوئی بڑا سکور نہیں کرپائے ہیں اور آج بھی وہ صرف چار رنز بناکر آؤٹ ہوئے۔

کرکٹ تجزیہ کار مظہر ارشد کے مطابق ایسا پہلی بار ہوا ہے کہ بابر اعظم اپنے کیریئر میں تین لگاتار میچوں میں 10 رنز سے کم سکور پر آؤٹ ہوئے ہوں۔

لیگ سپنر شاداب خان کو چار اوورز میں 22 رنز دے کر تین وکٹیں حاصل کرنے پر پلیئر آف دا میچ کا ایوارڈ دیا گیا اور ان کی اس شاندار کارکردگی پر انہیں بھی سوشل میڈیا پر خوب داد مل رہی ہے۔

پاکستان نے اپنا میچ تو جیت لیا ہے لیکن ٹی 20 ورلڈ کپ میں آگے بڑھنے کے لیے پاکستان آج انڈیا پر بھی انحصار کررہا ہے۔ اگر انڈیا آج جنوبی افریقہ کو شکست دے دیتا ہے تو میگا ایونٹ کے سیمی فائنل میں پہنچتا ہے تو پاکستان کے ٹورنامنٹ میں آگے بڑھنے کے امکانات روشن رہیں گے۔

انڈین صحافی ہیمانشو پاریک نے ایک ٹویٹ میں لکھا کہ ’دراصل میں پاکستان کو سیمی فائنلز کے لیے کوالیفائی کرتے دیکھنا چاہتا ہوں۔ کرکٹ ان کے بغیر بے رنگ ہوگی۔‘

صارفین ایک تعداد ایسی بھی ہے جو جیت کے باوجود بھی اپنی ٹیم سے خوش نہیں اور وہ چاہتے تھے کہ پاکستان ٹیم نیڈرلینڈز کی جانب سے دیا گیا 92 رنز کا ہدف برق رفتاری اور جارحانہ بیٹنگ کے ذریعے 10 یا 11 اوورز میں حاصل کرتی جس سے ٹیم کا نیٹ رن ریٹ بھی بہتر ہوتا۔

اسامہ نے ایک ٹویٹ میں لکھا کہ ’77 گیندوں پر 39 رنز چاہییں اور شاید آپ کو کوالیفائی کرنے کے لیے نیٹ رن ریٹ کی ضرورت پڑے اور پھر آپ شان مسعود کو بیٹنگ کرنے بھیج دیتے ہیں۔‘

طحہٰ سلیم بھی میچ کے دوران پاکستانی بیٹنگ دیکھ کر چراغ پا ہوتے رہے انہوں نے اپنی ٹویٹ میں لکھا کہ ‘یہ ٹک ٹک کیوں کر رہے ہیں۔ تیز کھیلیں، میچ ختم کریں اور نیٹ رن ریٹ بہتر کریں۔‘

ٹی 20 ورلڈ کپ میں پاکستان کا اگلا میچ اب 3 نومبر کو جنوبی افریقہ سے ہے جو کہ سڈنی کرکٹ سٹیڈیم میں کھیلا جائے گا۔