’اگلی مرتبہ اصلی مسٹر بین بھیجیں،‘ زمبابوے کے صدر کا پاکستان کو پیغام

ٹی 20 ورلڈ کپ کے اہم میچ میں زمبابوے نے پاکستان کو سنسنی خیز مقابلے کے بعد ایک رن سے ہرا دیا ہے۔

جمعرات کو پرتھ میں کھیلے گئے میچ میں زمبابوے نے پہلے بیٹنگ کرتے ہوئے پاکستان کو مقررہ 20 اوورز میں 131 رنز کا ہدف دیا تھا۔

اس ہدف کے تعاقب میں پاکستان کی بیٹنگ لائن ایک بار پھر  ریت کی دیوار ثابت ہوئی اور سات وکٹوں کے نقصان پر 129 رنز ہی بناسکی۔

زمبابوے سے ہار کے بعد ٹی 20 ورلڈ کپ میں پاکستان کا آگے کا سفر اگر اور مگر کا شکار ہو گیا ہے اور اسے اپنے بقیہ تینوں میچ اب ہر صورت میں جیتنا ہوں گے۔

زمبابوے کے صدر ایمرسن منانگاگوا نے بھی اپنی ٹیم کو جیت مبارکباد دی اور پاکستان کو کہا کہ ’اگلی مرتبہ اصلی مسٹر بین بھیجیں۔‘

پاکستان کی شکست کے بعد سوشل میڈیا صارفین غم و غصے میں نظر آرہے ہیں اور تلخ تبصرے ہی ہر جگہ دیکھنے میں آرہے ہیں۔

کچھ صارفین محمد نواز تو کچھ لوگ کپتان بابر اعظم اور محمد رضوان کو شکست کا ذمہ دار ٹھراتے ہوئے نظر آئے۔

عبید الرحمان نے ایک ٹویٹ میں لکھا کہ ’نواز نے ایک اور میچ ہروا دیا۔‘

ان کی اس ٹویٹ کے جواب میں عالیہ رشید نے لکھا ’کسی کو کچھ کہنے سے پہلے بابر اور رضوان کو اس ہار کی ذمہ داری لینی چاہیے۔‘

پاکستانی مڈل آرڈر بیٹر حیدر علی آج کے میچ میں بغیر رن بنائے واپس پویلین لوٹ گئے اور انہیں اپنی خراب کارکردگی پر شدید تنقید کا سامنا کرنا پڑ رہا ہے۔

میاں عمر نامی صارف نے لکھا ’حیدر علی بہترین فنشر ہیں۔ ایک دن وہ پاکستان کی کرکٹ فنش کردیں گے۔‘

پاکستانی بیٹرز کی کارکردگی پر اگر نظر ڈالی جائے تو شان مسعود کے علاوہ کوئی بھی بیٹر کریز پر رک نہیں سکا۔ انہوں نے 38 گیندوں پر 44 رنز بنائے۔

محمد رضوان نے 16 گیندوں پر 14 رنز، بابر اعظم نے 9 گیندوں پر 4، افتخار احمد نے 10 گیندوں پر 5، شاداب خان نے 14 گیندوں پر 17 اور محمد نواز نے 18 گیندوں پر 22 رنز بنائے۔

جبران ناصر نے ایک طنزیہ ٹویٹ میں 1999 کے ون ڈے  ورلڈ کپ میں پاکستان کی بنگہ دیش کے خلاف، 2007 کے ون ڈے ورلڈ کپ میں آئرلینڈ کی شکست اور آج ٹی 20 ورلڈ کپ میں زمبابوے کے خلاف اپ سیٹ کا حوالہ دیتے ہوئے لکھا ’پاکستان ٹیم دنیا پھر میں قوموں کو خوش کررہی ہے اور انہیں زندگی بھر کے لیے خوشگوار یادیں مہیا کر رہی ہے۔‘

صارفین کی ایک بڑی تعداد جہاں پاکستانی کھلاڑیوں پر تنقید کرتی ہوئے نظر آئی وہیں زمبابوے کو بھی بہترین کھیل پیش کرنے پر داد دینے والوں کی کوئی کمی نہیں ہے۔

ملالہ یوسفزئی نے ایک ٹویٹ میں زمبابوے کو جیت پر مبارکباد دیتے ہوئے پاکستانی نژاز زمبابوین کھلاڑی سکندر رضا کی خصوصی طور پر تعریف کی۔

سکندر رضا نے چار اوورز میں 25 رنز دے کر تین وکٹیں حاصل کیں۔

پاکستان کے سابق کپتان شاہد آفریدی نے ایک ٹویٹ میں لکھا ’میں اسے اپ سیٹ نہیں قرار دوں گا۔ اگر آپ نے میچ دیکھا ہے تو آپ کو پتہ ہوگا کہ زمبابوے نے پہلے ہی گیند سے ٹاپ کلاس کرکٹ کھیلی اور بتایا کہ بیٹنگ پچ پر کم رنز کا دفاع کیسے کرتے ہیں۔‘

سابق آسٹریلین کرکٹر بریڈ ہوگ نہ زمبابوے کو مبارکباد دیتے ہوئے لکھا کہ ’وہ پرتھ ایک سادہ سے گیم پلان کے ساتھ آئے اور پاکستان کا تختہ الٹ دیا۔‘

پاکستان ٹی20 ورلڈ کپ میں اپنا اگلا میچ نیدرلینڈز کے خلاف 30 اکتوبر کو پرتھ کے ہی گراؤنڈ میں کھیلے گا۔