بیرون ملک دوروں کا خرچ خود اٹھاتا ہوں: بلاول بھٹو کا دعویٰ

پاکستان کے وزیرخارجہ بلاول بھٹو نے سوشل میڈیا پر اپنے دوروں کے اخراجات کے حوالے سے اربوں کے اخراجات کے پروپیگنڈے پر اپنا ردعمل دیتے ہوئے کہا کہ وہ پاکستان کے واحد وزیر خارجہ ہیں جو اپنا ٹکٹ خود خریدتے ہیں اور اپنے ہوٹل کا بل خود ادا کرتے ہیں۔

پاکستان پیپلز پارٹی کے مطابق واشنگٹن میں گفتگو کرتے ہوئے بلاول بھٹو نے کہا کہ ’میں اپنے بیرون ملک دوروں کے اخراجات کا بوجھ قومی خزانے پر نہیں ڈالتا اور اگر ایسا کرتا بھی تو بطور وزیر خارجہ یہ میرا استحقاق ہے۔‘

 اپنے بیرون ملک دوروں سے متعلق سوال پر ردعمل دیتے ہوئے ان کا کہنا تھا کہ ’میں وزیر داخلہ نہیں بلکہ وزیر خارجہ ہوں میرے بیرون ملک دوروں کا فائدہ میری ذات کو نہیں بلکہ پاکستان کے عوام کو ہوا ہے۔‘

ان کا کہنا تھا کہ ’دیگر لوگ شاید چھٹی منانے بیرون ملک دوروں پر جاتے ہیں مگر ان کی محنت کی وجہ سے پاکستان فیٹف کی گرے لسٹ سے نکل گیا۔‘

وزیرخارجہ نے دعویٰ کیا کہ ان کے بیرون ملک دوروں کی وجہ سے پاکستان کو معاشی فوائد حاصل ہوئے۔

پاکستان اس وقت جی 77 یعنی پوری دنیا کے ترقی پذیر ممالک کے اتحاد کی قیادت کر رہا ہے۔

’ہم نے کوپ 27 میں تباہی سے ازالے کو ایجنڈے میں شامل کروایا اور یہ پاکستان سمیت تمام ترقی پذیر ممالک کی ایک بڑی کامیابی ہے۔ آپ ہماری جی 77 اصلاحات کی دستاویز کو ملاحظہ کریں، دنیا کے تمام ترقی پذیر ممالک نے مطالبہ کیا ہے کہ عالمی فنانشل ادارے امیر ممالک کے بجائے غریب ممالک کو فائدہ دیں۔‘