’میں سارہ ہوں‘، ریاض میں پہلی سعودی خاتون روبوٹ کی رونمائی

ریاض میں ٹیک کانفرنس لیپ 2023 میں پہلی سعودی روبوٹ خاتون کی رونمائی کی گئی ہے جو مہمانوں سے سعودی لہجے میں بات کر سکتی ہے۔

العربیہ کے مطابق روبوٹ خاتون کا نام سارہ ہے جسے سعودی ماہرین نے تیار کیا ہے۔

سعودی روبوٹ خاتون کو Qss کمپنی کے تعاون سے تیار کیا گیا اور وہ بات چیت کے علاوہ روایتی رقص بھی پیش کر سکتی ہے۔

سعودی روبوٹ یہ کہہ کر اپنا تعارف کراتی ہے کہ ’میرا نام سارہ ہے اور میں پہلی سعودی روبوٹ ہوں جسے سعودی ماہرین کے ہاتھوں تیار کیا گیا ہے۔‘

روبوٹ سارہ مصنوعی ذہانت اور جدید کیمروں سے لیس ہے جن کی مدد سے وہ سامنے والے کی شناخت کر سکتی ہے اور مختلف موضوعات پر گفتگو بھی کرسکتی ہے۔

روبوٹ سعودی عرب کے مختلف علاقوں کے لہجوں سے بھی واقف ہے اور ان میں بات کرنے کی صلاحیت بھی رکھتی ہے۔

واضح رہے کہ ریاض میں لیپ 23 نمائش جاری ہے جو وزارت اتصالات اور سعودی سائبر سکیورٹی کے تعاون سے منعقد کیا جا رہا ہے۔