عمران خان کی ممکنہ گرفتاری: ’ڈرتا نہیں، بس پولیس کو دیکھ کر شرما جاتا ہوں‘

اسلام آباد پولیس کے اہلکار پاکستان تحریک انصاف (پی ٹی آئی) کے چیئرمین عمران خان کو توشہ خانہ کیس میں گرفتار کرنے کے لیے لاہور میں ان کے زمان پارک میں واقع گھر کے باہر موجود ہیں۔

اتوار کو اسلام آباد پولیس کا کہنا تھا کہ ’عدالتی احکامات کے مطابق عمران خان کی گرفتاری کے لیے اسلام آباد پولیس کی ٹیم لاہور پہنچی ہے۔‘

اسلام آباد پولیس نے عمران خان کو گرفتار کر کے دارالحکومت کی ایک عدالت میں 7 مارچ کو پیش کرنا ہے۔

پولیس کا ٹوئٹر پر جاری ایک بیان میں کہنا تھا کہ ’عمران خان گرفتاری سے گریزاں ہیں۔ ایس پی صاحب کمرے میں گئے ہیں مگر وہاں عمران خان موجود نہیں۔‘

اسلام آباد پولیس کی جانب سے بیان جاری ہونے کے چند گھنٹوں بعد ہی سابق وزیراعظم عمران خان نے اپنے گھر میں کارکنان سے خطاب کیا اور کہا کہ وہ اپنے وکیلوں کے ذریعے سپریم کورٹ کے چیف جسٹس عمر عطا بندیال کو خط لکھیں گے اور بتائیں گے کہ انہیں ’مزاحیہ‘ کیسوں میں طلب کیا جا رہا ہے۔

اسلام آباد پولیس کی زمان پارک پہنچنے کی خبر جیسے ہی پھیلی پی ٹی آئی کی جانب سے اپنے کارکنان کو زمان پارک پہنچنے کا پیغام دیا گیا۔

پاکستان سوشل میڈیا پر بھی صارفین عمران خان کی ممکنہ گرفتاری پر تبصرے کر رہے ہیں۔

پاکستان مسلم لیگ (ن) کی سینیئر نائب صدر اور چیف آرگنائزر مریم نواز نے عمران خان پر تنقید کرتے ہوئے ایک ٹویٹ میں لکھا کہ ’شیر بے گناہ بھی ہو تو بیٹی کا ہاتھ تھام کر لندن سے پاکستان آ کر گرفتار دیتا ہے اور گیدڑ چور ہو تو گرفتاری سے ڈر کر دوسروں کی بیٹیوں کو ڈھال بناکر چھپ جاتا ہے۔‘

بروکن نیوز نامی مزاحیہ اکاؤنٹ نے عمران خان سے منسوب کرکے لکھا ’میں کسی سے نہیں ڈرتا، بس پولیس کو دیکھ کر تھوڑا شرما جاتا ہوں۔‘

شہزاد غیاث شیخ نے ایک ٹویٹ میں لکھا کہ ’جن لوگوں نے تاریخ نہیں پڑھی وہ کہتے ہیں کہ عمران خان عدالتوں میں جتھے اس لیے لاتے ہیں کیونکہ وہ واحد لیڈر ہیں جو لا سکتے ہیں۔‘

انہوں نے مزید لکھا کہ ’یقین کیجیے بھٹو اور شریف اگر جتھوں کو عدالت لانے چاہتے تو عمران خان کے مقابلے میں 10 گُنا بڑے لا سکتے تھے۔‘

محسن حجازی نے لکھا ’خان صاحب فی الحال گرفتاری دے دیں، بعد میں چاہے رپورٹیں بنواکر چلے جائیں۔ اس میں کیا ہے؟‘

عمران خان کا زمان پارک میں خطاب کے دوران یہ بھی کہنا تھا کہ وہ اسلام آباد جانے سے اس لیے بھی گریزاں ہیں کیونکہ ان کی جان کو خطرہ ہے۔

سابق وزیراعظم عمران خان کے بیان پر تبصرہ کرتے ہوئے سید حسین نے سوال کیا ’سر پنجاب اور خیبر پختونخوا میں الیکشن مہم زمان پارک سے چلائیں گے؟‘