پاکستانی ایئر لائنز ایئر سیال کی پہلی فلائٹ سعودی عرب روانہ

پاکستانی ایئرلائنز ایئر سیال نے غیر ملکی فلائٹس کا آغاز کردیا ہے اور اس کی پہلی پرواز بدھ کو 160 مسافروں کے ساتھ جدہ روانہ ہوگئی ہے۔

ٹوئٹر پر ایئر سیال نے صارفین کو مطلع کیا کہ ’ہماری پہلی غیر ملکی فلائٹ پی ایف 716 لاہور کے علامہ اقبال ایئرپورٹ سے جدہ کے لیے روانہ ہوگئی ہے۔‘

خیال رہے 22 مارچ کو ایئر سیال نے اعلان کیا تھا کہ ان کی پہلی غیر ملکی پرواز 29 مارچ کو سعودی عرب کے لیے روانہ ہوگی۔

ایئر سیال نے مختلف نجی بینکوں کے کارڈز پر ٹکٹ خریدنے والوں کے لیے ڈسکاؤنٹ کا بھی اعلان کر رکھا ہے۔

ایئر سیال کی جانب سے کچھ دنوں پہلے ایک ٹویٹ میں کہا گیا تھا کہ ایئرلائنز میں سفر کرنے والے افراد کو الائیڈ بینک، حبیب میٹرو بینک، حبیب بینک لیمٹڈ، مسلم کمرشل بینک اور بینک آف پنجاب کے کارڈز پر 10 فیصد ڈسکاؤنٹ دیا جائے گا۔

پاکستان کے شہر سیالکوٹ سے شروع کی گئی ایئرسیال ملک کی تیسری نجی ایئرلائن ہے۔ دسمبر 2020 میں شروع کی گئی ایئرلائن سیالکوٹ چیمبر آف کامرس کی ملکیت ہے۔