اداکارہ شہناز گِل نے سدھارتھ شُکلا کی موت کے بعد ’موو آن‘ کر لیا؟

انڈیا کے ریئلٹی شو ’بِگ باس‘ سے شہرت حاصل کرنے والی اداکارہ و گلوکارہ شہناز گِل کا کہنا ہے کہ وہ اپنی زندگی میں اب آگے بڑھ گئی ہیں۔

انڈین اخبار ہندوستان ٹائمز کے مطابق ممبئی میں فلم ’کسی کا بھائی کسی کی جان‘ کے ٹریلر کی لانچ کے موقع پر مووی کی کاسٹ موجود تھی، جب فلم کے ہیرو سلمان خان نے شہناز گِل سے کہا کہ ’موو آن کر جاؤ‘ (آگے بڑھ جاؤ)۔ جس پر وہ اپنا کچھ یوں جواب دیتی ہیں ’کر گئی ہوں۔‘

بِگ باس میں آنجہانی اداکار سدھارتھ شُکلا اور شہناز گِل کی دوستی اُن کے مداحوں کو اتنی پسند آئی تھی کہ انہوں نے اِس جوڑی کو ’سڈ ناز‘ کا نام دے دیا تھا۔

معروف انڈین اداکار اور ریئلٹی شو سٹار سدھارتھ شکلا ہارٹ اٹیک کے باعث ممبئی کے کوپر ہسپتال میں انتقال کر گئے تھے۔ اس وقت وہ اپنے کریئر کے ایک ایسے موڑ پر تھے، جب ان کی مقبولیت بڑھتی جا رہی تھی۔

شہناز گِل کی سدھارتھ شُکلا کے ساتھ بڑھتی ہوئی قُربت کسی سے ڈھکی چُھپی نہیں تھی۔ بِگ باس کا سیزن 13 ختم ہونے کے بعد بھی اُنہیں مختلف شوز میں ایک ساتھ دیکھا گیا اور ایسی افواہیں بھی گردش کر رہی تھیں کہ دونوں جلد شادی کے بندھن میں بندھ جائیں گے۔

تقریب میں شہناز گل سے پوچھا گیا کہ ’کیا وہ کسی کا بھائی کسی کی جان‘ میں کام کرتے ہوئے نروس تھیں؟‘ جس کے جواب میں اُنہوں نے کہا کہ ’نہیں، میں نروس نہیں ہوتی لیکن سلمان سر کے سامنے ہوتا ہی ہے۔ اپنے آپ کو دیکھ کر مجھے بہت اچھا لگ رہا ہے۔ میں اپنے آپ سے محبت کرتی ہوں۔ پہلی بات یہ ہے کہ آپ خود سے پیار کریں اور پھر بعد میں سلمان سر اور باقی سب ہیں۔ ایسے بڑے اداکاروں کے درمیان کھڑا ہونا واقعی بہت اچھا لگتا ہے جنہوں نے اپنی زندگی میں کچھ حاصل کیا ہو۔‘

اُنہوں نے بتایا کہ ’فخر کی بات یہ ہے کہ میں ابھی اِن (سلمان خان) کے پیچھے کھڑی ہوں۔ مجھے یاد ہے کہ مجھے ایک میوزک ویڈیو کے سیٹ پر جانا تھا اور جب میں سیٹ پر گئی تو مجھے ریجیکٹ کر دیا گیا۔ ویڈیو بنانے والوں نے کہا یہ بچی کون ہے؟ اور مجھے گھر بھیج دیا گیا۔ میں بہت روئی اور پھر میری والدہ نے مجھ سے کہا کہ رو مت، ایک دن تم سلمان خان کے ساتھ کام کرو گی اور اب میں محسوس کر رہی ہوں کہ میرے خواب کیسے پورے ہوئے۔‘

پیر کو فلم ’کسی کی بھائی کسی کی جان‘ کا ٹریلر ریلیز ہوا جس کی کاسٹ میں پوجا ہیگڑے، جگپتی بابو، بھومیکا چاولہ، وجیندر سنگھ، ابھیمنیو سنگھ، راگھو جوئیل، سدھارتھ نگم، جسی گل، پلک تیواری اور ونالی بھٹناگر کے ساتھ شہناز گل بھی شامل ہیں۔ یہ فلم اپریل میں عید کے موقع پر ریلیز ہو گی۔